Почитуван амбасадор на Швајцарија, Ваша Екселенција Вероник Хулман, Почитувани колеги пратеници, Почитувани експерти, претставници на институции, организации, партнери и пријатели на Собранието, Почитувани претставници на медиумите, Задоволство ми е да ви посакам добредојде на овој значаен настан, бидејќи оваа конференција има особено значење за мене лично, за Собранието и за граѓаните. Секој доаѓа на одредена функција со своја цел и визија, а за мене овој настан е важен токму затоа што преку него гледам како се конкретизира дел од мојата визија за едно транспарентно, отворено и одговорно Собрание пред граѓаните. Не е случајно што дигитализацијата на Собранието е еден од клучните приоритети на мојот мандат, затоа што верувам дека само преку транспарентност и ефикасност можеме да ја зајакнеме довербата на граѓаните во оваа институција.
Ова претставува и пресвртна точка за Собранието, бидејќи преку презентирањето на овие платформи се отсликува заедничката и сериозната посветеност за враќање на достоинството на институцијата. Во текот на изминатата година постојано нагласував дека транспарентноста е клучот во борбата против корупцијата и во градењето на едно почитувано Собрание. Со овие иницијативи се создава можност за сите граѓани, пратеници и за администрацијата да имаат полесен, побрз и поефикасен пристап до суштински информации. Овие дигитални платформи – „Веб платформа за канцелариите за контакт со граѓаните“ и „Дигитален мост“ – претставуваат иновативни алатки, односно софтверски решенија, кои имаат за цел да ја зајакнат врската помеѓу Собранието и граѓаните.
Во ерата на технолошката револуција, користењето на вештачката интелигенција и создавањето на дигитални асистенти кои помагаат во обработката и дистрибуцијата на информации од пленарните седници не претставува само релевантно решение, туку и значително олеснување за граѓаните, медиумите, администрацијата и истражувачите, кои имаат потреба од суштински информации за овие процеси. Од друга страна, електронската платформа за канцелариите за контакт со граѓаните не само што ја олеснува комуникацијата и пристапот на граѓаните до пратениците, туку обезбедува и прецизна статистичка слика за работата и ангажманот на пратениците и пратеничките групи. Виртуелниот простор е исто така така наречена „адреса“, па со оваа платформа, секој граѓанин има своја адреса – без оглед на неговата локација и на предизвиците за физички контакт со пратениците. Почитувани присутни, овие проекти се конкретен пример како технологијата може да се стави во служба на транспарентноста, ефикасноста и одговорноста. И токму затоа сум горд на реализацијата на овие платформи, кои имаат колосално значење.
Во овој контекст, ја користам приликата искрено да им се заблагодарам на нашите партнери – Националниот демократски институт (НДИ) и Центарот за управување со промени (ЦУП) – за плодната и креативна соработка во рамките на овој проект. Благодарност упатувам и до извонредните експерти од Symfonica и Brainster, кои се автори на оваа извонредна работа. Се разбира, најдлабока благодарност до Амбасадата на Швајцарија, за нивната безрезервна поддршка во изградбата на едно модерно Собрание. Сепак, ова го гледам само како почеток. Во својство на претседател на Собранието, ве уверувам дека ова Собрание ќе стане сè потранспарентно, подостапно и поодговорно. Иако ова е мојата прва година на оваа функција, мојата заложба е целосна и искрена – да создадеме Собрание кое навистина ќе биде дом за сите граѓани. Затоа, нека овие две платформи бидат првиот чекор кон едно посилно и подоверливо Собрание. Без да одземам повеќе од вашето време, дозволете ми да го завршам говорот со истата длабока убеденост со која и го започнав: „Транспарентноста е темелот на довербата, а довербата е темелот на едно силно, почитувано и достоинствено Собрание.“ Затоа, транспарентноста е нашата визија, а дигиталната трансформација е нашата мисија за таа визија да стане реалност.
