Кога беше изграден, хотелот Југославија беше повеќе од само хотел – тој беше симбол на престиж, моќ и амбиција на земја која сакаше да остави впечаток на целиот свет. Неговата изградба траеше повеќе од две децении, од 1947 до 1969 година и беше еден од најскапите градежни зафати во тоа време во Југославија. Проектот чинеше околу 45 милиони долари, што би било уште поимпресивна сума во денешни услови. Во времето на неговото отворање, хотелот беше меѓу најголемите и најлуксузните во Европа. Сместено на брегот на Дунав, имаше сè што можеше да посака елитата од тоа време – големи сали, пространи апартмани, врвни ресторани и ексклузивни удобности. Беше замислен како репрезентативен објект во кој Југославија ќе ги пречека најзначајните светски личности и токму тука се случија многу историски средби.
Посебно место во хотелот заземала Титовата резиденција, апартман опремен по највисоки стандарди, резервиран исклучиво за претседателот на СФРЈ и неговите најважни гости. Внатрешноста беше украсена со луксузен мебел, уметнички дела и најсовремени технолошки решенија во тоа време. Многу светски лидери, познати личности и угледни гости на Југославија имаа можност да престојуваат во овој ексклузивен дел од хотелот.
Но, историјата на хотелот Југославија не беше само приказна за луксуз, туку и за неговиот постепен пад. За време на бомбардирањето на НАТО во 1999 година, хотелот беше погоден од ракети, уништувајќи ги горните катови, вклучувајќи ја и резиденцијата на Тито. По војната, хотелот никогаш не бил целосно реновиран. Тој беше делумно реновиран и работеше во ограничен капацитет одреден период, но никогаш не го врати својот поранешен сјај. Со години се планираше негова реконструкција, но на крајот беа донесени различни одлуки – хотелот ќе се урне, а на негово место ќе се изгради луксузен станбено деловен комплекс со нов хотел од престижниот синџир Риц-Карлтон. Многумина веруваат дека иако новата зграда ќе донесе модернизација, нема да може да го замени историското значење што го имаше хотел Југославија.Од некогашниот симбол на престижот ќе останат само спомени и неколку вредни детали – познатиот лустер од лобито на хотелот ќе биде вратен во новиот објект, додека натписот „Хотел Југославија“ и скулптурата „Воден цвет“ ќе најдат место во експонатите на музејот. Така, дел од неговата приказна ќе преживее, иако самиот хотел наскоро повеќе нема да постои.
