Меѓународниот аеродром Скопје и Аеродромот „Орли“ во Париз од денеска се поврзани со директна авиолинија што ќе ја опслужува нискобуџетната авиокомпанија „Изиџет“ двапати неделно, секоја среда и сабота. Првиот лет на авиокомпанијата „Изиџет“ од аеродромот „Орли“ беше пречекан утрово на Скопскиот аеродром.
Новата авиолинија е воведена како резултат на финансиската поддршка од Владата преку Програмата за воведување на нови дестинации на Министерството за транспорт. Аеродромот „Орли“ се наоѓа на дваесетина километри од центарот на Париз, а покрај „Изиџет“, авиолинија од Скопје до францускиот главен град опслужува и авиокомпанијата „Визер“ до аеродромот „Бове“ оддалечен 90-тина километри од Париз.
-Утрово го пречекавме авионот на „Изиџет“ од аеродромот „Орли“. Меѓународниот аеродром Скопје се поврзува со француската престолнина која воедно е база на „Изиџет“, најголема компанија во Европа од аспект на авиодестинации – изјави заменик-генералниот директор на ТАВ Македонија, Перо Лупевски.
Тој истакна дека „Изиџет“ со летовите што ќе се реализираат двапати неделно ќе овозможи не само директен лет до Париз, туку и конекција до 160 други аеродроми во 35 земји.
-Посакуваме топло добредојде за „Изиџет“ и се надеваме дека нивните авиони ќе бидат полни со македонски патници кои ќе сакаат да слетаат во „градот на светлината“, а исто така посакуваме да имаме доста патници од Франција кои ќе сакаат да ги истражат убавините на Македонија. Оваа авиолинија ќе ги продлабочи исто така и културите врски меѓу двете земји и ќе придонесе исто така за македонската економија – рече Лупевски, посочувајќи и дека денеска се поврзуваат два аеродрома кои се членки на групацијата АДП.
Согласно договорот, оваа линија ќе оперира од денеска до 31 декември 2027 година со однапред определен ред на летање.
Според вицепремиерот и министер за транспорт Александар Николоски, ова е уште една можност за подобра комуникација и поврзување на државава со европските земји и европските метрополи.
-Париз е атрактивна дестинација за патување, но уште поважно е дека ќе носиме туристи во Македонија. Како Влада создаваме услови со кои привлековме нови авиокомпании во Македонија и резултатите веќе се видливи. Осум нови дестинации од аеродромот во Скопје и две од аеродромот во Охрид се воведени за многу краток период. Го променивме целосно моделот на субвенционирање и наместо за заминување, даваме финансиска поддршка за патници во доаѓање затоа што целта е што повеќе луѓе да доаѓаат во Македонија, а тоа значи дека ќе користат и други услуги во земјава и ова е стратегија која ја применуваме од самиот почеток и која ни дава конкретни резултати. Веќе преговараме со други авиокомпании и мислам дека сме на добар пат да постигнеме договор за нови дестинации – истакна Николоски.
Линијата Скопје-Париз е дел од договорот за финансиска поддршка за воведување на нови авиолинии што го реализира Министерството за транспорт преку јавен повик за субвенционирање. Од Скопје, се воведуваат и линиите кон Дубаи, Штутгарт, Лион, Барселона, Женева и Амстердам, а од Охрид кон Истанбул и Базел. Согласно Програмата за финансиска поддршка 2025-2027 година донесена од страна на Владата, предвидени се 360 милиони денари за субвенции за воведување на нови авиолинии. Целта е да се унапреди авиосообраќајот, да се обезбедат нови дестинации преку поволни услови за патување за граѓаните како и развој на цивилното воздухопловство. Со летниот распоред на летање што стапи во сила викендов, од Скопскиот аеродром оперираат 16 авиокомпании до 47 редовни дестинации, а три сообраќаат со 10 чартер летови.
