Израелската армија објави дека од Иран кон Израел биле испукани нови ракети. Во соопштението се вели дека цивилите треба да продолжат да ги следат упатствата на Командата за цивилна заштита и да останат во засолништа додека воздушната одбрана се обидува да ги собори ракетите, објавува „Тајмс оф Израел“. Членовите на Кнесетот ја прекинаа работата на комисијата и отидоа во засолништа поради сирените во Ерусалим, по предупредувањето од Командата за цивилна заштита. Сирените одекнуваат во делови од Ерусалим и други градови по лансирањето ракета од Иран. Претходно израелската војска соопшти дека нападнала шест аеродроми во западен, источен и централен Иран, уништувајќи 15 авиони и хеликоптери како дел од своите „напори за продлабочување на воздушната супериорност на иранското небо“.„Нападите оштетиле писти, подземни бункери, авион за полнење гориво и авиони Ф-14, Ф-5 и АХ-1 што му припаѓаат на иранскиот режим“, соопшти израелската војска, според NBC News. Во соопштението се додава дека нападот ја нарушил можноста за полетување од овие аеродроми и работењето на иранските воздухопловни сили од нив.
