Улични борби меѓу руските вооружени сили и украинските војници неколку месеци се водат во внатрешноста на Суџа во областа Курск. Но, она за што пишуваат светските новински агенции неколку дена по упадот низ празните гасоводни цефки на руските сили во Суџа е токму упадот на руските вооружени сили зад грбот на Украинците. Овој чекор останува да биде топ тема во светската јавност но и колку тоа во суштина била успешна акцијата и како истата се планирала.
Имено, околу стотина тешко вооружени руски војници тајно минаа низ гасоводот кон украинските позиции во областа Суџа, оставајќи пустош по нив. Руските воздухопловни сили ја подготвувале оваа специјална операција неколку дена, прецизно претходно бомбардирајќи го подрачјето каде војниците заминуваа за да го исчистат преминот. Темата која е заинтригирана светската јавност се впрочем подземните цевки на гасоводот Уренгој-Помари-Ужгород, преку кој Русија ја снабдуваше Европа со гас преку украинска територија до 1 јануари 2025 година. Според достапните податоци, дијаметарот на цевката е 1,4 метри. Како што наведуваат неколку воени извори објавени на украински и руски воени блогови, руската војска навистина успеала да влезе во Суџа преку подземен гасовод, за што потврдија и украинските медиуми и воени аналитичари, откривајќи детали од операцијата.
Според нив, руските вооружени сили го користеле гасоводот за тајно да пренесат пешадиски вод од околу стотина луѓе. Руските борбени авиони со денови ја подготвувале оваа операција, насочена кон областа преку која војниците требаше да излезат во Суџа. Украински извори додаваат дека вооружените сили на Украина не успеале да го минираат претходно гасоводот поради логистички проблеми. За потсетување, гасоводот Уренгој-Помари-Ужгород минува низ Суџа и до крајот на минатата година се користеше за транспорт на руски гас во Европа преку украинска територија. Воените аналитичари објаснуваат дека дијаметарот на цевката од 1,4 метри му овозможува на поединецот да се наведне и да се движи низ неа.
Затоа, сега може да се каже дека одлуката на Киев да го прекине транзитот на руски гас низ Украина практично ги стави украинските сили во Суџа во безизлезна и не безбедна ситуација. Веќе пристигнуваат извештаи од градот за интензивни улични борби меѓу руските војници и украинските сили. Оваа операција на руските сили поттикна размислувања за можноста за користење на гасоводот за таен транспорт на елитни единици во специјални мисии, сценарио за кое секоја земја треба да се подготви, наведува порталот Оружје-онлајн.
Руски напад врз украинските сили во руската област Курск
Од друга страна за потсетување украинските војници минатото лето ненадејно извршија громобрански напад и зазедоа делови од руската Курска област. Во меѓувреме за време на викендот руските сили започнаа офанзива од големи размери со цел враќање на територијата под украинска контрола во западниот дел на Курската област, објавија сите руски блогери и високи воени команданти.
Украинските сили го нападнаа регионот Курск минатото лето, заземајќи делови од територијата во ненадејна операција, повеќе од две години откако рускиот претседател Владимир Путин нареди инвазија на Украина. „На сите правци на фронтот Курск, сите единици започнаа широка офанзива“, изјави преку Телеграм генерал-мајор Апти Алаудинов, командант на чеченската единица Ахмат што се бори во Курск. „Непријателот ги напушта своите позиции“, додаде тој.
Во исто време „Ројтерс“ не можеше да ја потврди ситуацијата на теренот, додека украинските вооружени сили засега одбиваат да ги коментираат нападите. Рускиот воен блогер „Два Мајора“ вчера објави дека руските сили извршиле напад врз Суџа, град на околу 9,5 километри од границата со Украина и дека ситуацијата за украинските војници станува исклучително критична.
Значаен тактички потег беше инфилтрацијата на руските сили во Суџа преку празен дел од гасоводот Уренгој – Помари – Ужгород. Според извештаите, повеќе од 800 руски војници и доброволци ја користеле оваа рута, што им овозможило незабележано да влезат во градската индустриска зона и да започнат борби во станбени области. Генерал-мајор Алаудинов изјави дека во жестоките борби учествуваат руски десантни бригади, механизирани пешадиски единици и специјалните сили „Ахмат“, додавајќи дека руските војници „добро напредуваат“. Инаку, руската армија вчера повторно зазеде три села во областа Курск и тоа Викторовка, Николаевка и Стараја Сорочина, соопшти руското Министерство за одбрана. Ројтерс не беше во можност самостојно да ја потврди оваа информација.
