Оскари 2025: „Анора“ на Шон Бејкер триумфираше на Оскарите

03/03/2025 19:09

Романтичната драма „Анора“ (Anora) на режисеорт Шон Бејкер триумфираше на овогодишните Оскари со вкупно пет награди, меѓу кои најзначајни се за најдобар филм, најдобра актерка и најдобар режисер. Во филмот се раскажува за приказната за Ани Михеева, 23-годишна стриптизерка од Бруклин. Нејзиниот живот неочекувано се менува кога се мажи за Иван „Вања“ Захаров, синот на богат руски олигарх. Нивниот импулсивен брак доведува до судир со моќното семејство на Вања, кое сака да го поништи. Филмот истражува теми како љубовта, динамиката на моќта и личната слобода.

Актерката Мајки Медисон беше во тесна трка во конкуренцја со Деми Мур и Синтиа Ериво, и го опиша освојувањето на Оскарот за најдобра актерка како „сон што стана реалност“. Режисерот Шон Бејкер стана првата личност што лично освои четири Оскари за еден филм – за режија, монтажа, сценарио и продукција на „Анора“. Меѓу другите победници таа вечер беа Киран Калкин, Адриен Броди и Зои Салдана, додека Латвискиот „Flow“ ја освои наградата за најдобар анимиран филм, а „I’m Still Here“ ја доби наградата за најдобар меѓународен филм.

Наградата за најдобар режисер ја врачи Квентин Тарантино, кој претходно ја ангажираше Медисон за мала улога во неговиот филм „Once Upon a Time in Hollywood“. Примајќи го трофејот од Тарантино, Бејкер изјави: „Ако ти не ја ангажираше Мајки Медисон… немаше да има ‘Anora’.“ Адриен Броди беше прогласен за најдобар актер за неговата улога во „The Brutalist“, каде што ја толкува улогата на унгарско-еврејски архитект кој по Втората светска војна се преселува во САД за да изгради нов живот. Броди немаше номинација за Оскар од 2003 година, кога стана најмладиот добитник на наградата за најдобар актер за филмот „The Pianist“.

Зои Салдана беше прогласена за најдобра споредна актерка за нејзината улога во шпанско-јазичниот мјузикл „Emilia Pérez“, кој раскажува приказна за нарко-бос што ја менува својата родова идентичност. Ѕвездата на „Succession“, Киран Калкин, ја освои наградата за најдобар спореден актер, категорија во која доминираше низ целата сезона на награди.

Најдобар филм