По повод 80 години „Остен“ и Денот на шегата, на 1 април, во галерија „Остен“ беше отворена изложба на карикатури и хумористично-сатирични текстови на членови на редакцијата на „Остен“ и долгогодишни соработници со наслов „Еден за сите, сите за никаде!“ Брендот „Остен“, како и подоцна основаните Светска галерија на карикатури и Светска галерија на цртеж, веќе 80 години опстојува во културниот амбиент на државата, иако од 2004 година се случи трансформирање на брендот во приватна компанија, под раководство на Мице Јанкуловски. Почетоците на „Остен“ се во 1945 година, како прилог за сатира во билтенот на Првата македонска народноослободителна ударна бригада, под името „Сред поле ѕунѕуле“. Пионерите на „Остен“ во овој период биле Лазар Мојсов, Блаже Конески, Владо Малески, Киро Хаџивасилев и други.
Првиот број на „Остен“ излегол на 1 јануари 1945 година. Од 1951 до 1966 година „Остен“ се развива како весник, се јавуваат рубрики за хумор, сатира и карикатура во дневните весници, но започнува да се појавува и на нов медиум – на Радио Скопје. Во тој период поддршка на весникот дава Здружението на новинарите на Македонија, а главен уредник е Владо Малески, при што на оформување на весникот волонтерски учествувале плејада општествени и културни работници, меѓу кои: Славко Јаневски, Панде Јаревски, Василие Поповиќ-Цицо, Цветан Станоевски, Дарко Марковиќ, Миле Попоски, Ацо Шопов и други. Во својот развој до 1968 година весникот оформува своја професионална редакција и нејзин прв главен уредник е Дарко Марковиќ. Редакцијата на „Остен“ во 1969 година ја основа и ја организира Светската галерија на карикатури, манифестација која до денес се организира секоја година. Една година подоцна „Остен“ и Светската галерија на карикатури влегуваат во состав на тогашниот НИП „Нова Македонија“.
Јубилејот на „Остен“ беше одбележен на 1 април со изложба во галеријата „Остен“ и со доделување повелби за придонес во развојот на карикатурата, хуморот и сатирата во Македонија. На настанот беа доделени Повелби на автори или на членови на нивните семејства. Повелби на „Остен“ добија карикатуристите Василије Поповиќ-Цицо, Дарко Марковиќ, Дукан Јелен, Владо Јоциќ, Ѓуро Варга, Боро Пејчинов, Ане Василевски, Димитар Чудо, Панде Јаревски, Глигор Костовски, Никола Анѓелкоски, Наташа Костовска, Александар Јанковиќ, Миро Георгиевски, Мице Јанкуловски, Миле Ѓорѓијоски, Мирослав Грчев, Лазо Плавевски, Владо Бороевиќ, Славољуб Игњатовиќ, Јордан Поп Илиев, Делчо Михајлов, Сунчица Божиновска, Живко Козар, Блаже Докуле, Миле Манчевски, Ласко Џуровски, Драган Поповски; текстописците Живко Павлов, Љупчо Сиљановски, Софе Штерјоски, Ефтим Проески, Иван Карадак, Миле Попоски, Васил Толевски; како и Македонка Поповска – секретарка на редакцијата „Остен“ и ЗНМ – основач на првата професионална редакција на „Остен“. Од 1945 година, „Остен“ се етаблира како истакнат бренд што ја претставува уметноста, слободната мисла и неограниченото творештво. Како посветен покровител на уметноста и страстен колекционер, „Остен“ обезбедува платформа за уметници низ светот преку Светската галерија на карикатури „Остен“ и Биеналето за современи визуелни уметности „Остен“. Крунско достигнување на овој потфат е создавањето Музеј „Остен“ Скопје. (Текстот е објавен во „Културен печат“ број 275, во печатеното издание на весникот „Слободен печат“ на 5-6.4.2025)
