На седница на Владата ќе биде побарано салата „Партизан“ да се врати под ингеренции на државата, сѐ со цел овој спортски објект што побрзо да биде ставен во функција и да им биде на располагање на граѓаните на општина Карпош како и на сите што се занимаваат со спорт, професионално или рекреативно – велат од Министерството за спорт.Владата има намера да ја одземе спортската сала „Наум Наумовски Борче“, кај карпошани позната како „Партизан 4“, откако по реконструкцијата на крајот на декември 2024 година, ја додели на стопанисување на локалната власт.
Советниците на последната седница на Советот на Општина Карпош со официјален заклучок се спротивставија на ваквата намера, откако градоначалникот Стевчо Јакимовски ги информира дека на седница на Генералниот секретаријат на Владата, како точка на дневен ред, се разгледува предлог за одземање на спортската сала, иако во изминатата година Општината вложила средства во нејзиното одржување.
Салата дури во март годинава, по повеќе од една година откако беше изградена, ги отвори вратите за спортување и во неа се одржаа натпревари во рамките на училишните спортски лиги во кошарка и одбојка. Во претходниот период беше затворена, затоа што, како што објаснуваа од Општината, салата им била предадена без греење и без потребните реквизити, иако поранешната Агенција за млади и спорт најавувала ќе ја предаде салата „Партизан“, како сосема нов, современо реконструиран и целосно опремен спортски објект.
Долго време разговаравме и со претходното раководство и со сегашниот министер за спорт, но без успех. Затоа, ние како локална самоуправа распишавме тендер и со 1.060.000 денари купивме два нови централни кошови, мрежа за одбојка, рипстоли, ги опремивме соблекувалните со нови клупи и други реквизити. Во исто време морам да кажам дека имаме делови од објектот каде веќе се појави и влага, што значи дека салата е изработена неквалитетно. За ова го известивме и сегашниот министер за спорт, но оттаму немаме никаков одговор – посочи неодамна Јакимовски.
Во меѓувреме дел од салата со одлука на Советот е доделен на користење на Стрелачката федерација на Македонија, а на претходната седница во објектот е доделена и канцеларија за потребите на граѓанското здружение „Културно ехо“. Во тек се и јавни повици за изнајмување делови од салата. Дополнително вложени се и средства од Општината за доопремување со спортски реквизити и приклучување на централно парно.
Ова е крајно некоректно. Еднаш стапив во контакт со министерот Борко Ристовски, набрзо кога стана министер, потоа неколкупати се обидував околу тоа што течеше објектот, што немаше никаква опрема. На крај вложивме пари и приклучок за парно греење и сега наеднаш „гром од ведро небо“. Ова е во духот со децентрализацијата или централизација? Оваа сала треба да им се стави на располагање на граѓаните на Карпош –посочи градоначалникот на седницата на Советот.
На прашањето од советник дали Општината има законски мерки да преземе нешто доколку Владата донесе таква одлука, Јакимовски посочи дека мора да се слушне и мислењето на локалната самоуправа.
Во Генералниот секретаријат на Владата има многу стручни луѓе, тоа ви е филтерот практично пред Уставен суд. За секоја одлука на Влада, законски измени, закони, тие си го даваат своето мислење од аспект на уставно-правен карактер, како и од аспект на усогласеност со други закони. Мислењето на Секретаријатот е многу битно, а тоа вели дека корисникот мора да се праша – рече Јакимовски и посочи дека досега од Владата ниту ја известиле Општината за нивната намера ниту некој разговарал со нив.
Тој посочи дека има информации дека и базенот што се гради до спортската сала, Владата сакала да ѝ го даде на Пливачката федерација.
Тој базен нам ни треба за пливачко описменување на учениците од основните училишта во општина Карпош. Тој не ни треба за бизнис, за Пливачка федерација од клубови да наплатува. Тоа се работи во базенот во „Борис Трајковски“. Ова е мал базен, детски, за да се научат децата да пливаат – посочи градоначалникот.
Од Општина Карпош на прашањето колку имаат инвестирано досега во спортската сала, велат дека станува збор за сума поголема од 2 милиони денари – половина од парите за набавка на дел од потребната опрема за салата и уште толку за хортикултурно уредување и поставување систем за наводнување.
Дека ќе се бара одземање на салата од Општината, потврдуваат и од Министерството за спорт. Оттаму тврдат дека по согледувањата и жалбите увиделе дека има проблеми околу стопанисувањето со спортската сала „Партизан“, која по реконструкцијата е предадена во владение на Општина Карпош.
Воедно, и градоначалникот на Општина Карпош Стевчо Јакимовски изјави во јавност дека има тешкотии во стопанисувањето со салата, а и по добиените информации дека салата не се одржува квалитетно, затворена е за користење и не е ставена во употреба повеќе од 12 месеци, одлучивме да не дозволиме овој спортски објект да пропаѓа. Од тие причини, на седница на Владата ќе биде побарано салата „Партизан“ да се врати под ингеренции на државата, сѐ со цел овој спортски објект што побрзо да биде ставен во функција и да им биде на располагање на граѓаните на општина Карпош како и на сите што се занимаваат со спорт, професионално или рекреативно – велат од Министерството.
Спортската сала „Партизан“ во Карпош 4, кој е култен објект за карпошани, е донација на француската влада за обнова на Скопје по катастрофалниот земјотрес во 1963 и е изградена во 1969 година, според проект на архитектот Трајко Димитров.
Салата беше во државна сопственост до 2005 година кога Јавното претпријатие за стопанисување со спортски сали ја даде под концесија на 30 години на фирмата „Сенгруп“. Но, наместо да ја заживее, салата целосно беше уништена и преполна со ѓубре.Општина Карпош на почетокот на 2019 година поведе иницијативата за спас и обнова на салата, а потоа, во соработка со меѓународната невладина организација „Културно ехо“, спроведе анкета за избор на идејно решение. Идејните проекти беа подготвени од домашни и од странски млади архитекти, а изборот преку анкета го направија граѓаните на Карпош.Реконструкцијата на оваа спортска сала, за која Агенцијата потроши 1,1 милион евра, започна во април 2022 година, а заврши во декември 2023.
