Парламентарната соработка е суштински дел од заедничките напори за регионален развој, стабилност и јакнење на институциите. Во период на значајни геополитички промени, парламентите се сврзно ткиво меѓу граѓаните и процесите на донесување одлуки, а градење на меѓусебната доверба е гаранција за регионалната стабилност и унапредување на регионалната соработка. Вакви пораки се испратени од денешното свечено отворање на 65. Состанок на Комисијата за правни прашања и меѓународна соработка на Парламентарното собрание на Организацијата за Црноморска економска соработка (ПАБСЕК), кој се одржува во Собранието на Република Северна Македонија.
Учесниците на настанот од Парламентите на Северна Македонија, Србија, Грција Албанија, Туркије, Бугарија, Украина, Романија, Грузија, Ерменија и Азербејџан, како членки на ПАБСЕК, на овој состанок на Комисијата за правни прашања и меѓународна соработка, дискутираат за меѓународната соработка во борбата против организираниот криминал во Црноморскиот регион.
Претседателот на Собранието на РСМ, Африм Гаши, во поздравното обраќање на отворањето на настанот, порача дека во изминатите децении ПАБСЕК се потврди како платформа која не само што поврзува парламенти, туку и гради доверба меѓу нации, стимулира економска соработка и поттикнува демократија.
„Во свет во кој често сме сведоци на подривање на правните системи, растечки авторитаризам и отежнат мултилатерализам, наша обврска како парламентарци е да останеме гласници на законитоста, на демократијата и на транспарентноста. Неопходно е да се потсетуваме дека парламентите не се само институции за носење закони – тие се чувари на вредностите кои ги надминуваат националните граници“, рече Гаши.
Генералата секретарка на Собранието, Марина Димовска, истакна дека законодавниот дом е активен учесник во сите процеси кои ја унапредуваат меѓународната парламентарна соработка. За нас, рече таа, ваквите средби се повеќе од формалност – тие се можност за дијалог, учење и сојузништво.
„Можам со гордост да потврдам дека собраниската служба стои цврсто зад вредностите на транспарентност, институционална зрелост и демократска одговорност. Нашата улога е да обезбедиме стабилна и поддржувачка средина во која ќе се развиваат парламентарните процеси и ќе се унапредуваат регионалните односи“, рече Димовска. На отворањето на настанот се обратија и Мустафа Хамарат, потпретседател на Комисијата за правни прашања и меѓународна соработка и Асаф Хаџиев, генерален секретар на ПАБСЕК, истакнувајќи ја, исто така, важноста на парламентарната соработка во насока на обезбедување траен проспертитет и долгорочна стабилност на Регионот. Предлог-извештајот го образложи известителот Камран Бајрамов од Азербејџан, кој ја потенцира значајната улога на парламентите во глобалната борба против организираниот криминал, со носење ефикасни закони и нивен надзор, но и важноста од меѓуинституционална соработка. Воведување најдобри практики е најефикасната мерка во справувањето со криминалот, заедно со развој на мултилатерални сфери за дијалог, меѓународни стандарди, ефикасни стратегии за создавање безбедни средини. Во таа насока потребен е и силен судски систем, посветеност на добро управување и владеење на правото.
Пратеничката Благица Ласовска, пак, како шефица на Делегацијата на Собранието на РСМ во ПАБСЕК, нагласи дека Црноморскиот регион, како крстопат меѓу Европа и Азија, има клучна улога како врска меѓу Исток и Запад, Север и Југ. Но оваа стратешка предност воедно го прави Регионот ранлив и подложен на трговија со луѓе, шверц и сајбер-криминал. „Заедно мора да обезбедиме овој регион да биде мост за соработка, а не патека за криминални активности. Во тој контекст, меѓународната соработка не е избор, туку неопходност. Потребни ни се не само билатерални договори, туку и активно координирање, споделување информации, усогласени законски рамки и заеднички активности“, рече Ласовска. Уверувањата од 65. Состанок на ПАБСЕК е тој да биде еден вид пресвртница, кога ќе се помине од зборови на дело. За претседател на Комисијата е избран Мустафа Хамарат од Туркије, а за потпретседателка Благица Ласовска.
