Распитот на Влатко Кешишев на судењето за убиствата на Вања Ѓорчевска и Панче Жежовски почна, но претходно неговиот адвокат Игор Ефремов предложи додека Кешишев го дава исказот, Љупчо Палевски да биде отстранет од судницата затоа што Кешишев во присуство на Палчо нема да ја зборува вистината. Како што рече адвокатот Ефремов, неговиот клиент Кешишев веќе еднаш доставил па повлекол изјава, а таа изјава Палевски му ја дал да ја препише, потпише и достави како своја.
-Сметам дека со ова е извршено влијание врз исказот на Кешишев и затоа сметам дека неговиот страв е оправдан дека нема да ја зборува вистината во негово присуство – рече адвокатот на Кешишев.
На ова се противеше адвокатот на Палевски, Јовица Страшевски, кој рече дека немало потреба за вакви драми и сцени и дека Кешишев можел да си ја зборува вистината искрено.
-На Палевски би му било оневозможено да си поставува прашања ако биде отстранет од судница и да фаќа прибелешки. Судот не треба да го дозволи ова барање. На вакви блефирања пред јавноста судот не треба да попушти – рече Страшевски.
Палевски пак, смета дека адвокатот на Влатко Кешишев се служи со невистини, изнесува факти што не постојат, заборавил да приложи пишана изјава од Палевски дека го терал да ја препише изјавата.
-Ова е вторпат да изнесува лаги без да приложи доказ дека јас сум давал писма-изјави што треба да се препишат од негова страна. Молам да бидам присутен зашто на претходните испрашувања не сум укорен дека сум прекинувал искази на обвинети или дека сум влијаел. Може и да си биде свртен со грб накај мене ама мене ми е важно да го слушнам – рече Палевски.
И Кешишев сакаше Палевски да не е во судницата додека дава исказ. Судијата на крајот одлучи Палевски да биде отстранет од судницата зашто постои сомнеж дека во негово присуство Кешишев нема да ја зборува вистината.
