Нов распишан тендер за софтвер во Здравствен дом-Скопје е причината поради која вработените во оваа јавно-здравствена установа со која директорува Самир Исени, се во голем хаос и проблеми. Возач на итната помош за „Слободен печат“ вели дека 38 години не му се случило ова што му се случува сега – административните забрани му се одбиваат од платата, а не се уплаќаат таму за каде што се наменети, во банка!
-Бидејќи имам хипотекарен кредит, вообичаено ми се задржува дел од платата и автоматски се уплаќа во банката како рата. Но, откако директорот го отстрани стариот систем, мене парите ми се задржуваат, ама не се уплаќаат во банка. Отидов кај директорот во канцеларија да го прашам каде се парите, ми одговори дека ми ги прикачуваат на друго место, ми ги чувале. Го прашав дали на дрво ми ги прикачуваат парите и да ми ги дадат, за да си ги однесам во банка да си ги уплатам самиот, бидејќи очигледно е дека самата установа не го прави тоа преку сметководството како што беше случај пред тендерот. Молчеше. И вчера самиот отидов во банка да уплатам рата, зашто ми се јавуваа дека доцнам и дека мартовската рата од кредитот Здравствен дом Скопје ми ја уплатил на крајот на мај. Не можам да ги чекам нив и да се доведувам во ризик од извршители, а каматите очекувам да ми ги плати Здравствен дом Скопје, изјави за „Слободен печат“ возач на итната медицинска помош со 38-годишен стаж чиј идентитет ѝ е познат на редакцијата. Тој додаде дека за оваа ситуација запознаен бил премиерот Христијан Мицкоски и финансисиската полиција.
„Парите на сметка одбиени, а ние должни“
Друга вработена чиј идентитет исто така ѝ е познат на редакцијата, ни рече дека Фондот за здравство го има исплатено покачувањето за март кон вработените од Здравствен дом, ама тоа не легнало на сметките на вработените, туку е во некој „облак“ и порамнување не е направено. За вработените во Здравствен дом Скопје да го добијат покачувањето од март месец, установата треба да испрати барање за порамнување.
-Откако почна ова со софтверот, немаме додатоци на плата. Платите претходно беа уплаќани на 10-ти секој месец, а последните три месеци се доцни. Сумите за административните и синдикалните забрани не се уплатени на местата каде што ги должиме, а на сметка не ни се прикажуваат, што значи дека ни се земени и стојат во некој „облак“. Не ни ги даваат ни парите да одиме сами да си ги уплатиме. Парите на сметка одбиени, а ние должни. Покачувањето од ФЗОМ е префрлено, но за март месец ние не го гледаме, корекција ќе се направела месецов и така ни кажуваат секој месец – рече таа. Претседателот на независниот синдикат на здравствени работници Боби Бојчевски за „Слободен печат“ изјави дека поради тоа што директорот на Здравствен дом Скопје решил да го заменува софтверот во установата – тоа довело до административен башибозук на кој жртви се сите.
-Поради заменувањето на софтверот, не е исплатено мартовското покачување на платата како што беше предвидено. Имаме членови на синдикатот кои имаат хипотекарни кредити за станови, но веќе 2 месеци не се пуштени пари кон банките иако тие им се одбиени од платите. Нашите членови што со синдикални потврди зеле производи од продавници со кои Синдикатот има склучено договор – мебел, бела техника – исто така два месеци не им се одвоени ратите и не се исплатени кон продавниците. Наместо да се работи на стариот софтвер кој е тука во Здравствен дом со години и вработените знаат да го работат, а потоа кога ќе пристигне новиот да бидат обучени сметководителите, се случува обратното: прво го вадат целосно стариот софтвер, а новиот не знаеме каде е. Ова доведе до хаос во платниот промет на Здравствен дом Скопје, ни рече Бојчевски.
Бекап прво „има“ па „нема“
На страницата на Бирото за јавни набавки може да се види објавениот оглас кој тече до 12 јуни за „услуги за одржување и поправка на софтвер“. Од прикачените документи се гледа дека тендерот неколку пати бил пролонгиран со роковите односно се продолжило времето за доставување понуди, од непознати причини. Во тендерската документација во која имавме увид, оставен е простор цената на софтверот да се плати поскапо, ако се јави само еден понудувач што ќе понуди повисока цена од таа што е утврдена во одлуката за јавната набавка на софтверот. Од денот на потпишувањето на договорот, истиот мора да се испорача во рок од 60 дена според објавената тендерска документација. Во меѓувреме, стариот софтвер е изваден од употреба а директорот на Здравствен дом Скопје Самир Исени вели дека немале бекап на податоците и потребно било време тој бекап да се обезбеди. Инаку „Слободен печат“ пред 2 месеци кога првпат почнаа проблемите со софтверот и кога на вработените им доцнеа платите, го праша директорот Исени дали имаат бекап на податоците од вработените и тогаш тој ни одговори:
„Информацијата која сте ја добиле не е точна, значи имаме бекап и ако сакате може да дојдете и да се уверите на лице место“. Но, два месеци подоцна, кога му го поставивме прашањето во што е проблемот со софтверот поради кој има административни неисплаќања на кредити на вработените и не било исплатено мартовското покачување на плата за 1.300 луѓе, тој ни рече:
-Боби Бојчевски не е директор и тој знае многу добро дека проблемот е во тоа што бекапот го немаме. И сега дури да го вратиме требаше време. А во меѓувреме процедурата за нова фирма е во тек и би требало да се заврши до крајот на овој месец. Кредитите на сите се исплатени, освен на 4-5 души коишто имале грешки при внесувањето на податоците, но и за нив ќе се реши деновиве, изјави директорот на Здравствен дом Скопје Исени.
