Мал е бројот на операции до 15 часот, а ако се плати „на приватно“ да се изврши интервенцијата после работното време, тогаш хирурзите стануваат веднаш слободни да оперираат и им се буди заинтересираноста. Вакви се поплаките од пациентите и причините што доведуваат до давање поткуп за здравствена услуга, расипничка и коруптивна пракса што го јаде државното здравство. Јавна тајна се и „тарифниците“ за давање мито преку посредници. Лекарите ретко се осудуваат на кардиналната грешка да ги земат парите на рака. За тоа постојат цели системи со посредници, места каде се остава митото. Од друга страна, „честењето“ на медицинскиот персонал е вкоренето во менталитетот и дел од „пациентската култура“. На тешко болни пациенти, дури и од рак, не им се дава термин за операција во редовен термин, но им се нуди опција да дојдат попладне и приватно да платат за интервенцијата. Министерот за здравство Арбен Таравари за оваа пракса добивал и информации и пријави во Министерството за здравство, ама не вродиле со плод – не е фатен никој на дело. Од друга страна пак, Министерството за здравство бидејќи не е истражен орган, не може да бележи банкноти. Затоа граѓаните треба да пријавуваат кога доктор им бара поткуп исклучиво во полициска станица. Потоа постапката се состои во тоа што полицијата ќе ги забележи сериските броеви на конкретните банкноти и потоа кога ќе бидат предадени на митаџијата – тој ќе биде процесуиран.
Темата за земањето, барањето и давањето поткуп во јавното здравство, ја актуелизираше најновата кривична пријава против хирург и раководител на одделение во Клиничката болница Битола, кој бил фатен ин флагранти, на дело, со 150 евра обележани банкноти што според пријавата од МВР и Обвинителството – ги побарал од член на семејството на пацеиентка на која успешно ѝ ја извадил жолчката на операција. Таравари вели дека ако се докаже делото во суд, нему Лекарската комора треба да му ја одземе лиценцата. Министерот е и доктор. Запрашан да искоментира општо, дали во македонското здравство постои мито вели – „има мито и тоа е непобитен факт“ но докажувањето е нешто друго. Ги охрабри граѓаните да пријавуваат факти за барање поткуп и во МВР и во Министерството за здравство. -За Битола имам точни информации. Ја известив директорката на болницата дека имаме жалби за еден доктор таму. Имиња нема да споменувам, не сум судија ни полиција и постои презумпцијата на невиност. Но, вакви акции треба да продолжат. Јас ги повикувам пациентите да пријават кај нас и во полиција ако некој им бара мито, да пријават и кај директорите на клиниките и тука сме да ги слушнеме и да провериме дали е вистина, рече Таравари. За хируршките клиники во Скопје, Таравари добил пријава за неправилности со термините ама немало резултат, останало само на пријава. -Не беше констатирано нешто, си имаше редовно операции. Некогаш има и пријави што не се издржани, вели тој. И дел од граѓаните на социјалните мрежи се свесни за проблемот со митото. Oткако го воведоа системот на операции надвор од работно време и им дадоа само по еден оперативен ден од 8 часа, сега митото е повеќе присутно од претходно. Ваквиот систем, кој не знам кој имаше причина да го воведе и зошто, само е пак на товар на пациентите – митото се зголемува, нема реален преглед дали реално хирургот има полна листа на операции во редовно време. Дава термини од ракав, половина од термините се демек „резервирани во мој термин од самата клиника“, за да не можат специјалистите од другите градови каде не се вршат вакви операции сами да им закажуваат операции на пациентите. Ваквиот систем е тотално деструктивен и треба да се забрани можноста за операција на приватно надвор од работно време. Има хирурзи што прават што сакаат, вели Благојче Петрески, граѓанин.
Таравари ги повикува граѓаните да пријавуваат ако им се бара поткуп во МВР. -Откако сме дојдени вршиме редовен притисок врз сите клиники и болници да даваат повеќе термини. Бројот на термини е зголемен двојно но не е доволно. Сепак времето на чекање за испитување и прегледи е најкратко споредено со целиот регион, смета министерот. Инаку, против лекар од битолската болница кој сега е суспендиран, се води постапка за примање поткуп. Тој е во притвор поради опасност да избега. Според обвинителството тој на 27 јануари, како лице кои вршело работи од јавен интерес, односно како доктор – хирург на Одделението за хирургија при ЈЗУ Клиничка болница „Д-р Трифун Пановски“ Битола, извршил интервенција – операција на жолчно ќесе врз пациентка, а потоа индиректно, преку сведок, побарал од синот на пациентката да му даде пари во износ од 150 евра за да се почастел за извршената работа. Синот следниот во просториите на болницата, во плик му дал на осомничениот три банкноти од по 50 евра. Откако осомничениот ги примил, му бил извршен претрес и овластени службени лица од СВР Битола ги пронашле и одзеле парите.
