Генералниот секретар на Арапската лига, Ахмед Абул Геит, на самитот на Светската влада во Дубаи изјави дека инсистирањето на овој план може да го турне Блискиот Исток во нов циклус на кризи со „погубни ефекти врз мирот и стабилноста“. Трамп предизвика бес во арапскиот свет кога неочекувано објави дека САД ќе ја преземат Газа, ќе преселат повеќе од два милиони Палестинци и ќе ја развијат областа во „Ривиера на Блискиот Исток“. Оваа изјава предизвика длабока загриженост кај Палестинците, кои стравуваат од повторување на „Накба“ – катастрофата од 1948 година кога речиси 800.000 Палестинци избегаа или беа протерани за време на војната што доведе до основање на Израел. По 16 месеци израелски воздушни напади во војната во Газа, кои следеа по нападот на Хамас врз Израел во октомври 2023 година, многу Палестинци стравуваат од целосно раселување, а Трамп веќе им најави дека нема да можат да се вратат во своите домови во Газа.
Можен крај на примирјето и нова ескалација на конфликтот. Израелскиот премиер Бенјамин Нетанјаху во вторникот изјави дека прекинот на огнот во Газа ќе заврши и дека воените операции против Хамас ќе продолжат доколку палестинската милитантна група не ги ослободи заложниците до сабота напладне. Хамас подоцна објави соопштение во кое ја потврди својата посветеност на прекинот на огнот, обвинувајќи го Израел дека го загрозува. Иако Хамас постепено ги ослободува заложниците од почетокот на примирјето на 19 јануари, во понеделникот објави дека повеќе нема да ослободува затвореници поради израелските прекршувања на договорот. „Ако ситуацијата повторно ескалира, сите напори за воспоставување прекин на огнот ќе бидат залудни“, предупреди генералниот секретар на Арапската лига Абул Геит. Јасем ал Будаиви, генерален секретар на Советот за соработка во Заливот, го повика Трамп да ги земе во предвид долгогодишните односи меѓу арапските земји и Вашингтон, но додаде дека арапскиот свет нема да го прифати неговиот план.
Јордан и Египет категорично го отфрлаат предлогот на Трамп. Трамп предложи Палестинците од Газа да се преселат во соседните земји како Јордан и Египет, но двете земји ја отфрлија идејата. За Јордан, каде што веќе живеат голем број Палестинци, оваа идеја потсетува на претходните планови на израелските ултранационалисти за целосно протерување на Палестинците од Газа и Западниот Брег, со што всушност Јордан ќе стане замена за палестинска држава. Египетскиот претседател Абдел Фатах ал Сиси смета дека планот е сериозен безбедносен проблем. Тој смета дека исламистичките групи како Хамас се закана за Египет и за целиот регион и ја отфрла можноста членовите на таа организација да ја преминат границата и да се населат во Египет. Каиро ќе биде домаќин на итен арапски самит на 27 февруари на кој ќе се разговара за „сериозните“ случувања поврзани со Палестинците. Генералниот секретар на Арапската лига Абул Геит навести дека иницијативата од 2002 година, во која арапските држави му понудија на Израел нормализација на односите во замена за палестинска државност и целосно повлекување од териториите заземени во 1967 година, може повторно да се активира.
Планот на Трамп ја менува повеќедецениската политика на САД. Предлогот на Трамп претставува радикална промена во сегашната американска политика, која со години се залагаше за решение со две држави – Израел и Палестина, кои постојат една до друга. Како дел од примирјето, кое требаше да трае 42 дена, досега се ослободени 16 од 33 израелски затвореници киднапирани од Хамас, додека пет тајландски заложници се ослободени надвор од планираниот договор. Како дел од договорот, Израел ослободи стотици палестински затвореници, вклучително и оние кои отслужуваат доживотна затворска казна за смртоносни напади, како и луѓе приведени и држени без обвинение за време на војната, објави Ројтерс.
