Повеќе од 100 лица се уапсени во Лос Анџелес од понеделникот вечерта за време на протестите против мерките на претседателот Доналд Трамп против нелегалната имиграција, соопшти во вторникот Полициската управа на Лос Анџелес. Околу 96 лица беа уапсени во центарот на Лос Анџелес во понеделникот вечерта поради нераспуштање и учество во нелегален собир, соопшти полицијата. Според медиумските извештаи, уште 14 лица се уапсени под сомнение за грабеж, додека тројца се уапсени за отпор при апсење, напад со смртоносно оружје и оштетување на имот.
Двајца полицајци кои беа однесени во болница на лекување се отпуштени од болницата. Репортер на ДПА оцени дека ситуацијата во градот вчера наутро била генерално мирна. Граѓаните со денови протестираат во Лос Анџелес против рациите на силите за спроведување на законот насочени кон апсење и депортирање на имигранти. Претседателот Трамп нареди распоредување на илјадници војници од Националната гарда и 700 маринци во калифорниската метропола, тврдејќи дека ситуацијата е надвор од контрола. Градоначалничката на Лос Анџелес, Карен Бас, во вторник објави воведување ноќен полициски час во центарот на вториот најнаселен урбан центар во Соединетите Држави, по последователни ноќни инциденти и вандализам.
„Прогласив локална вонредна состојба и воведов ноќен полициски час во центарот на Лос Анџелес за да го прекинам вандализмот и грабежите“, информираше демократската избрана функционерка, обраќајќи се на претставниците на печатот.
