Основачот и басистот на култната група ,,Нови фосили”, Маринко Колнаго (83), беше погребан вчера во Загреб, и од него покрај семејството и пријателите се простија и останатите членови од групата, Сања Долежал и Владимир Кочиш Зец. Големиот музичар беше испратен со хитот на ,,Нови фосили”, песната ,,Сонувај ме”. За Маринко, членовите на бендот често изјавуваа дека е душата на ,,Нови фосили” и благодарение на него опстојуваа над 50 години.
Пред една година, лани во април, по пауза од 30 години ,,Нови фосили” одржа концерт во Скопје. Настапија Сања, Зец и Маринко и приредија незаборавно доживување за македонската публика. За концертот кој се одржа во Македонска филхармонија кажаа дека е нивно последно гостување во земјава, бидејќи по 55 години на сцената, време им било да направат проштална турнеја и да се збогуваат со публиката. – Зад нас се многу години, многу работи поминавме заедно. Време е. Но, кога веќе се простуваме, тоа ќе го направиме како што треба, кажа тогаш Сања.
Последниот концерт од прошталната турнеја го одржаа во Загреб, лани во ноември и кажаа дека повеќе нема да пеат на сцена. -На сцена повеќе нема да пееме. Можеби некогаш ќе запееме некаде, во публика, но бендот има многу години, време ни е да се повлечеме достоинствено, порачаа членовите не бендот за хрватските медиуми. Покрај Маринко, Сања и Зец, во ,,Нови фосили” членуваа и Ѓуѓица Барловиќ, првата вокалистка, која ненадејно почина на 42-годишна возраст во 1992 година. Рајко Дујмиќ пак, почина во 2020 година, на 66-годишна возраст, откако неколку дена помина во кома по тешка сообраќајна несреќа. И сопругот на Сања, тапанарот во бендот, Ненад Шариќ, почина во 2012 година, а во 1984 година почина и првиот тапанар на групата, Слободан Момчиловиќ Мока. Групата зад себе остави ризница од евергрини кои и денес се актуелни и прифатени од младите генерации.
