Еден полицаец е убиен, а негов колега е тешко повреден во Боливија во среда за време на нови судири меѓу поддржувачите на поранешниот претседател Ево Моралес, кои блокираа пат, и безбедносните сили кои се обидуваат да го расчистат собирот, соопшти владата.
„Имаше пукање, едно лице беше убиено, а друго беше тешко повредено“, изјави заменик-министерот за внатрешни работи Џони Агилера за боливиската телевизиска мрежа Унител, додавајќи дека двете жртви биле полицајци. Немирите избувнаа во рударскиот град Јајагва, во регионот Потоси, каде што 17 лица, меѓу кои и двајца боливиски полицајци, беа повредени во вторник во судири меѓу гневните граѓани и поддржувачите на поранешниот претседател Моралес.
Претходно вчера, претседателот Луис Арсе најави заедничка операција на полицијата и армијата за отстранување на блокадата на главниот автопат во централниот дел од земјата, најавувајќи дека ќе следат уште. Од 2 јуни, поддржувачите на Моралес блокираа десетици патишта во државата под Андите, барајќи оставка од претседателот во заминување Арсе, кого го обвинуваат дека е одговорен за длабоката економска криза во земјата, како и за манипулирање со судството и изборните органи со цел да го спречат својот лидер да учествува на претседателските избори на 17 август.
