Во соопштението кое утрово го испрати Министерството за внатрешни работи беа објавени иницијали на сопственикот на возилото, односно беше соопштено дека не станува збор за возило на полицаец туку на С.К. кој добил казна за непрописно паркирање. (Фото: СДК.МК)
Колата „порше“, која на 22 март беше непрописно паркирана на велосипедска патека на улицата Орце Николов во скопско Дебар Маало, била возена од поранешниот министер за надворешни работи Срѓан Керим. Откако видеото во кое се гледа дека пајак службата и полицијата не сакаат да го кренат возилото беше објавено на социјалните мрежи и предизвика низа реакции во јавноста, граѓани пишуваат дека „поршето“ е на Керим кој во тој момент бил во една од кафеаните на Боемска улица. Очевидци велат дека Керим тогаш бил во друштво со сопругот на претседателката Гордана Сиљановска-Давкова, Благој Давков. Полицаецот во видеото вели дека колата е на полициски службеник на должност.
Во соопштението кое утрово го испрати Министерството за внатрешни работи (МВР) беа објавени иницијали на возачот на возилото односно беше соопштено дека не станува збор за возило на полицаец, туку на С. К. кој добил казна за непрописно паркирање.Редакцијата САКАМДАКАЖАМ.МК испрати прашања до Министерството за внатрешни работи и до министерот Панче Тошковски дали возилото е на Срѓан Керим, дали тој бил во друштво со сопругот на претседателката Гордана Сиљановска-Давкова и дали тој како сопруг на претседателката има полициско обезбедување кое спречило пајакот да го крене возилото.
Министерот Тошковски ни одговори дека во моментов се води постапка на Одделот за внатрешна контрола.„Штом се испита во целост фактичката состојба ќе ве информираме дополнително за сите детали“, одговори Тошковски.
Прашања испративме и до Кабинетот на претседателката Гордана Сиљановска-Давкова, дали обезбедувањето на сопругот Благој Давков спречило да се подигне возилото на Керим. Од таму ни одговорија да се обратиме во МВР.„Кабинетот на претседателката Гордана Сиљановска-Давкова не е дел од овој настан. Случајот е во надлежност на Министерството за внатрешни работи, каде, според информациите коишто се јавно објавени, веќе се постапува“, велат од Кабинетот на Сиљановска-Давкова.
Срѓан Керим, ексминистер за надворешни работи во Владата на Љубчо Георгиевски и претседател на 62. заседание на Генералното собрание на Обединетите нации во 2007-2008, беше еден од двајцата осомничени во случајот на СЈО за кривични дела за пропаднатата медиумска компанија Медиа принт Македонија (МПМ). Осомничен беше за кривичните дела: лажен стечај, повластување на доверители и злоупотреба на службената положба и овластувањата, за кои се предвидени затворски казни. Откако од сопствеништвото на МПМ се повлече Орка холдинг на бизнисменот Орце Камчев, Срѓан Керим беше единствениот сопственик на фирмата која ги издаваше дневните весници „Вест“, „Утрински“ и „Дневник“ и магазинот „Теа Модерна“ . Откако Керим и директорката Јана Станисављева го однесоа МПМ во стечај, доверителите останаа со ненаплатени долгови од оваа компанија во износ од над 3 милиони евра. Додека тој беше управител престанаа со печатење весниците, при што беа отпуштени над 300 новинари, печатарски работници и придружни службеници, и овие весници веќе не постојат.
Во 2010, беше откриено дека возачот на Керим во МПМ во март 2008 бил фатен на унгарската граница во обид да изнесе кеш од 750.000 евра скриени во шише од кола-кола. На цариниците наводно им изјавил дека тоа се пари на МПМ во Скопје, кои ги носи во истоимена фирма во Виена. МВР тогаш потврди дека во ноември 2009 макеоднската држава била запознаена од унгарските служби дека имало таков случај, но истрага за тоа никогаш немаше во земјава.Во мај 2021, Керим беше меѓу 26-те членови на Стратешкиот совет за надворешна политика, како советодавно тело на Министерството за надворешни работи (МНР) формирано од министерот Бујар Османи.
На социјалните мрежи беше објавено видео снимено од граѓани, кои повикале пајак-служба за да се подигне возилото на сопственикот кој седел во една од кафеаните на Боемска улица. Во видеото се гледа како најпрво полицаецот не дава налог да се крене колата велејќи дека е на полициски службеник на должност. На ова граѓаните реагираат и прашуваат каква должност има кога 4 часа лицето седи во кафеана. По притисокот од граѓаните, полицаецот дава налог и пајак-службата на ЈП Паркинзи Општина Центар (ПОЦ) го подигнува возилото.Од МВР претпладнево соопштија дека се постапува за овој случај, а лицето сопственик на колата не е полициски службеник.
„Во врска со видеото на социјалните мрежи на кое се гледа непрописно паркирано возило со скопски регистарски ознаки на територија на Дебар Маало во Скопје, Министерството за внатрешни работи ја информира јавноста дека конкретниот настан се случил на 22 март. Имено, возилото е подигнато од страна на ПОЦ, а од страна на СВР Скопје преземени се мерки по член 63 став 6 од Закон за безбедност на сообраќајот на патиштата и на возачот на возилото С. К. издаден му е платен налог. Исто така, ве информираме дека предметното возилото не е на полициски службеник. Во врска со постапувањето, пак, на полициските службеници при подигнувањето на возилото, веќе постапува Одделот за внатрешната контрола, криминалистички истраги и професионални стандарди при МВР и по завршување на целокупната постапка соодветно ќе ја известиме јавноста“, велат од МВР.
