Германската министерка за надворешни работи Аналена Баербок денеска во Киев изјави дека САД не треба да бидат заведени од, како што ја нарече, „тактиката на одложување“ на рускиот претседател Владимир Путин, пренесе украински „Цензор“. „На претстојниот состанок на министрите за надворешни работи на НАТО, јасно ќе и ставиме до знаење на американската страна дека не треба да учествуваме во тактиката на застој на Путин“, рече таа во изјавата објавена по нејзиното ненајавено пристигнување во главниот град на Украина.
Шефовите на дипломатиите на земјите членки на НАТО се среќаваат во четврток и петок во Брисел. Кремљ вчера соопшти дека Русија и САД работат на идеи за можно мировно решение во Украина и градат билатерални односи, иако американскиот претседател Доналд Трамп изјави дека е „лут“ на Путин. Баербок, член на владата на германскиот канцелар во заминување, Олаф Шолц, рече дека сега е уште поважно безусловната поддршка на Украина бидејќи преговорите меѓу Русија и САД се во „ќорсокак“. Путин „се преправа дека е подготвен за преговори, но тој не се помрднува од својата позиција (ниту) за милиметар“, додаде таа.
