Васо Јованов, кој ја усмрти 22-годишната Фросина Кулакова на пешачки премин, во минатото зад себе имал дури 11 сообраќајни прекршоци, и тоа за возење без возачка дозвола, возење под дејство на алкохол, непочитување на семафор и пешачки премин, во текот на 2023 и 2024 година. Покрај тоа, во ноември 2022 година, сторил и едно кривично дело – сообраќајна несреќа со полесни последици. Овие податоци денес ги дозна јавноста, откако беа објавени од страна на скопското обвинителство. Неказнивоста на Јованов, кој и покрај кривичното дело и прекршоците, се уште управувал со автомобил, на крај резултираше со сообраќајка со смртни последици, кога на 29-ти јануари, пред полноќ, на пешачки премин ја усмрти младата Фросина од Неготино, која на зелено светло поминувала на пешачки премин. Денес скопското Обвинителство поднесе обвинение за неговиот татко Зоран Јованов за кривично дело – Предизвикување општа опасност од член 288 став 4 во врска со став 1 од Кривичниот законик, бидејќи иако знаел дека синот не смее да управува со автомобил бидејќи нема возачка дозвола и е повеќекратен сторител на сообраќајни деликти, му давал да управува патничко моторно возило.
Според Кривичниот законик, во член 288, став 1, тој што со моторна сила, електрична или друга енергија или со друго општо опасно дејствие или средство ќе предизвика значителна опасност за животот или телото на луѓето или за имот од големи размери, ќе се казни со затвор од шест месеци до пет години. Според член 4 пак, тој што делото од ставот 1 го стори од небрежност, ќе се казни со парична казна или со затвор до три години. Набргу откако се случи сообраќајката во која загина Фросина, јавноста бараше одговорност и од родителите на Јованов, кои му давале да го управува возилото. Тие заедно со нивниот адвокат Сашо Дуковски излегоа на прес, каде Зоран Јованов кажа дека кобната вечер Васо го украл автомобилот. Околу тоа колку пати во минатото тој го „крадел“, автомобилот, со кој успеал да стори едно кривично дело и 11 прекршоци, пред да ја усмрти Фросина, јавноста тогаш не доби одговори. И семејството на Кулакова, на собир кој се одржа во Кавадарци набргу по трагедијата, јавно побара одговорност и од таткото на Јованов кој му овозможувал да управува автомобил без возачка дозвола. Лицата кои овозможиле нивните деца да учествуваат во вакви кривични дела треба да одговараат за постапките на своите помлади полнолетници. Општеството не смее да биде заложник на луѓе без морални темели, а функциите не смеат да бидат засолниште за тие кои не ги почитуваат законите во својот дом и надвор од него. За Фросина бараме правда не само од убиецот, бараме правда и од таткото. Правда за Фросина мора да има за да не се повтори, кажа сестрата на Фросина, Росица Кулакова за време на собирот во Кавадарци во февруари.
