Претседателката Гордана Сиљановска-Давкова делумно го помилува поранешниот помошник министер во МВР, Ѓоко Поповски, односно му даде помилување од една година. Сепак, оваа реакција на претседателката може да се смета како задоцнета, бидејќи Поповски, со неодамнешната одлука на Апелација, доби намалување на казната, со што од затвор требаше да излезе на крајот на мај. Ова значи дека со помилувањето на Силјановска сега тој ќе излезе од затвор порано само за два месеци. Имено, на 6 март годинава, Апелација донесе пресуда со која казната затвор од 8 години и два месеци (збир од казните за „Тенк“ и „Триста“) му ја намали на 7 години.
Во пресудата на Апелација пишува дека во казната од 7 години на Поповски му се засметува времето кое го поминал во притвор и она што досега го издржал од казната. Поповски зад решетки влезе на 22 мај 2018 година, што значи и дека казната му истекува за неполни два месеци, односно на 22 мај годинава. Оваа одлука на второстепениот суд е донесена по жалба од Поповски кој побарал преиначување на правосилната пресуда без повторување на постапката, по што е одговорено во негова полза. Екс помошник министерот во МВР е еден од ретките обвинети од СЈО кој најдолго време помина зад решетки. Беше обвинет дека извршил набавка на 300 возила за МВР во периодот од 2008 до 2012 година, при што не ги почитувал законските прописи за јавна набавка и го оштетил буџетот 453.570 евра. Правосилната казна за оваа дело му беше пет години. За случајот „Тенк“, за набавката на мерцедесот, пак доби 4,5 години затвор, додека поранешниот премиер Никола Груевски, како поттикнувач за извршување на делото доби две години затвор.
