Претседателот на Собранието на Република Северна Македонија, Африм Гаши, учествуваше на Интернационален научен собир, во организација на МИТ Универзитетот, со гостински предавања на професори од Оксфорд Универзитетот, во рамки на Програмата „Конекција Оксфорд“. Во своето обраќање, претседателот Гаши истакна дека овој настан е посебен момент за академската заедница, затоа што нуди можности за зајакнување на меѓународната соработка и размена на знаења и искуства кои придонесуваат за унапредување на науката и технологијата. Претседателот Гаши изрази поддршка за продлабочување на соработката меѓу научните институции, преку вакви настани, кои не само што го поддржуваат развојот на науката и образованието, туку и го зајакнуваат нашиот ангажман во областите на истражувањето и знаењето, кои се од суштинско значење за напредокот и унапредувањето на општеството.
„Во свет каде што науката, иновациите и технологијата напредуваат со огромна брзина, а државите се натпреваруваат со најразлични откритија, малите земји како нашата се соочуваат со предизвикот да го следат темпото на овој развој. За жал, земји како Северна Македонија и оние од регионот немаат конкурентна предност во економијата и природните ресурси, како што имаат поголемите и помоќни држави. Поради тоа, цврсто верувам дека науката, истражувањето и знаењето се областите во кои треба да се натпреваруваме“, рече Гаши.
