Превирањата во коалицијата „Вреди“ продолжуваат откако вчера коалицијата излезе со став дека одлуката на Алијанса за Албанците на Арбен Таравари да одат со посебни советнички листи за советници на претстојните избори е донесена во интерес на ДУИ. Од коалицијата велат дека не го исклучиле Таравари, но дека тој со ваквата одлука се самоисклучил. Ваквиот чекор на Таравари, според коалицијата Вреди, значи проблем во Владата, но не прецизираат дали ќе побараат негово разрешување.
Лидерот на Демократското движење Изет Меџити, кој е дел од коалицијата, вчера на прес-конференција по состанокот на кој присутвуваа и лидерите на Беса, Биљал Касами и на Алтернатива, Зеќирија Ибраими, рече дека Таравари ќе мора да даде објаснување пред Албанците, но и пред гласачите на Влен за својата постапка. Според Меџити, одлуката на Таравари да оди со свои листи на изборите не се базира ниту на ставовите на партиската база, ниту на мислењето на гласачите на Алијансата на Албанците, ниту пак на независните анкети, туку е во интерес на ДУИ. Целта, како што рече Меџити, е да се разедини коалицијата Вреди и да се врати ДУИ од клиничка смрт.
– Колкава била цената на оваа операција и дали вредело сето тоа, ќе се дознае многу брзо, рече Меџити. Коалицијата Вреди, како што соопшти Меџити, на локалните избори ќе настапи заеднички со советнички листи и со кандидати за градоначалници, а во наредните денови ќе се формираат и заеднички изборни штабови за заеднички настап на претстојните избори. Во вторникот, Централното претседателство на Алијанса за Албанците одлучи да оди на претстојните избори со свои листи за советници, а за градоначалници, како што беше посочено, одлуката ќе биде донесена дополнително. Лидерот на АА Арбен Таравари по состанокот изјави дека оваа одлука нема да придонесе за промени, односно дека остануваат како партија во рамки на коалицијата „Вреди“ и во состав на Владата. Според Таравари, ваквата одлука била донесена затоа што во коалицијата Вреди не ја прифаќале нивната идеја пред да се донесат одлуки за кандидати за градоначалници и советници да се испита мислењето на граѓаните и гласачите.
– Не излегуваме од коалицијата „Вреди“, излегуваме со наши листи. За кандидати за градоначалници сме отворени за разговори. Немаме одлука за тоа, побаравме од „Вреди“ заедно, алатка да биде сондажа. Не е прифатливо за нас четворица луѓе да седнат и да одлучуваат. Локални избори се малку поинакви. Се бара тој што има поддршка, без разлика од која партија е. Некаде можеби треба кандидатот да биде и непартиски. Ние сме сè уште дел од „Вреди“, ние излегуваме со наша листа за советници. Ако одлучат тие поинаку, ние нормално на тоа ќе донесеме наша одлука, рече Таравари. За можната соработка со Зијадин Села, Таравари рече дека сите се добредојдени.
Коалиционите партнери во Владата ги следат случувањата во Вреди, но велат дека не е загрозена стабилноста на Владата. За денеска прес-конференција најави Движењето ЗНАМ, кое е дел од владината коалиција, на која ќе информира за заклучоците на Извршниот одбор за актуелната политичка состојба. Вчера, лидерот на ЗНАМ, Максим Димитриевски во телевизиска изјава рече дека превирањата во Вреди не се закана за Владата, но дека за нив е неприфатливо било кој од Владата да соработува со ДУИ. Од владејачката ВМРО-ДПМНЕ за превирањата во Вреди велат дека се внатрешно прашање на коалицијата Вреди.
