Земјите – членки на ЕУ одобрија законска измена што го олеснува уништувањето на волците за заштита на добитокот. Статусот на заштита на волците ќе се намали од „строго заштитен“ на „заштитен“. Европските одгледувачи на добиток пријавија зголемен број напади од волци врз добиток како што се овци и говеда.
„Новиот статус ќе им даде на земјите-членки поголема флексибилност во управувањето со популациите на волци. Сепак, земјите – членки мора да продолжат да обезбедуваат поволен статус на заштита за волците и може да продолжат да го наведуваат волкот како строго заштитен вид во националното законодавство, како и да имаат построги мерки за заштита на ова диво животно“, се вели во соопштението на Европскиот совет.
Групите за права на животните ја критикуваа промената во статусот на заштита на волците, тврдејќи дека нема научна основа за овој потег. Тие тврдат дека добитокот како што се овците би можел подобро да се заштити без зголемување на уништувањето. Проблемот е особено распространет во Германија. Министерството за животна средина на земјата соопшти дека волкот ќе остане заштитен вид и нема да биде предмет на неограничено уништување.
„Сепак, проблематичните волци можат полесно да се истребат“, се вели во соопштението на министерството.
Германскиот федерален центар за документација и советување за волци регистрираше нагло зголемување на бројот на убиени или повредени животни од волци во текот на изминатата деценија, со 5.727 потврдени повредени животни во 2023 година, повеќето од нив овци.
