Сестрата на Фросина, Росица Кулакова апелира нејзината сестра да не биде злоупотребена за правење на ситни политички поени. Таа порача дека бара правично и фер судење и казна за сторителот на делото Васил Јованов. „Ние сме гласот на Фросина, валкани пари- смртни последици“, гласи големиот црн транспарент со кој неколку стотини граѓани на 16 февруари излегоа на протестен марш барајќи правда за загинатите во сообраќајни несреќи како и ригорозни казни за прекршителите на сообраќајните правила кои предизвикале смртни последици. Сестрата на Фросина, Росица Кулакова апелира нејзината сестра да не биде злоупотребена за правење на ситни политички поени. Таа порача дека бара правично и фер судење и казна за сторителот на делото Васил Јованов. – Протестираме за подобра правда, правичност, промена на системот, но бараме и да не се злоупотреба несреќата на мојата сестра за ситни политички поени – изјави Росица Кулакова. Граѓаните го започнаа протестот на скопскиот булевар Партизански одреди каде што загина Фросина Кулакова, 22 годишна девојка која на 29 јануари, беше прегазена додека минувала на пешачки премин, од автомобилот на 20-годишниот возач, кој според официјалните информации, немал возачка дозвола, имал алкохол во себе и поминал на црвено.
Таткото на Фросина, Тодор Кулаков пред почетокот на протестот апелираше до демонстрантите да учествуваат во мирен марш. – Станува збор за исклучително племенито девојче и во нејзина чест ве молам ова да биде мирен протестен марш – изјави Кулаков. Тој нагласи дека од страна на надлежните институции, вклучително и владата се преземени сите правни чекори, но истакна дека протестите се со една цел, да се спречат понатамошни несреќи и губење на човечки животи. – Од страна на владата и владините институции, многупати кажав дека е направено се, и многу сум благодарен, но протестираме за правда, протестираме да нема нови жртви. Инаку, серијата протести доаѓаат откако на 29 јануари Васил Јованов кој возел без возачка дозвола и под дејство на алкохол на пешачки ја усмрти Фросина. На Јованов му е изречена мерка притвор, а од страна на надлежните се заострени контролите на сообраќајниците, а во собранието се иницираше и јавна расправа на која министерот за внатрешни работи Панче Тошковски најави измени во кривичниот законик, односно делот за кривични прекршоци.
Семејството на Фросина го предводеше протестиниот марш, и во првите редови до нив се родители и семејства на жртви во сообраќајни несреќи кои бараат правда за своите најблиски. Меѓу демонстрантите има и луѓе со транспаренти кои бараат правда и за загинатите во сообраќајната несреќа кај селото Ласкарци. Сообраќајката во која беше прегазена Фросина Кулакова не е прва која предизвикува бурни реакции и гнев кај граѓаните за дивеењето по улиците. На булеварот Партизански одреди изминатите години згаснаа неколку млади животи. Во 2015 беше прегазена студентката Фросина Цековска од 26-годишен возач возач кој исто така беше под дејство на алкохол и со брзина поголема од дозволената. Во јануари 2022 година, 24-годишната Викторија Николова од Радовиш во јануари, беше прегазена на истиот булевар, но кај трговскиот центар Сити мол. Возачот кој имал 22 години, според Обвинителството, тогаш возел со поголема брзина од дозволената.
