„Јавната дебата мора да биде проникната со сите заинтересирани страни, не може да се прави во тесен круг на луѓе. Етичноста на концепцијата ќе се постигне кога ќе излезе во јавност, кога ќе ја повика фелата да се изјасни што има да каже. Математиката е оперирање со знаци, математиката не е етичко мислење. Позицијата на филофоската група на предмети е неприкосновена. Никаде во светот држава која се дефинира себеси за цивилизирана и којашто гради образовно-воспитен процес, никаде во светот го нема тој момент на укинување на филозофски група на предмети“, изјави Серафимовски. Пратеничката проф. Николова порача дека предложената концепција е неиздржана која ќе произведе лошо гимназиско образование.
„Не постои земја во регионот, во Европа, а можеби и пошироко кадешто во гимназија филозофија не е задолжителен предмет. Ова е еден голем преседан. Етика и логика досега беа изборни предмети, моето лично убедување беше дека дури некој ќе се сети и ќе има потреба етиката од оној дел на изборни предмети да се префрли во делот на задолжителни предмети, имајќи ги предвид сите случувања, со добро однесување, но и булинг во училиштата итн. Не знам како нашите деца ќе ја развиваат критичката мисла ако ја немаат филозофијата, ако немаат логика, ако немаат етика. Не знам како ќе станат одговорни граѓани, како ќе го унапредуваат и заедничкото живеење, бидејќи индивидуалното треба секогаш да е проследено и со колективното. Во интерес на доброто и иднината на нашите деца оваа концепција треба и те како да претрпи промени, да биде повлечена“, посочи Николова. Предлог-концепцијата за гимназиско образование мора да се подготви со поддршка од стручната јавност и практичарите во образованието.
