Соодносот на превезената стока со железницата наспроти камионскиот превоз и досега беше 80:20. Првиот воз меѓу Скопје и Солун сообраќа од 9 јули 1873 година Прекин на железничкиот товарен транспорт, зголемени трошоци поради пренасочувањето на превозот со камиони кон Бугарија и нови чекања на патните граници е најкусиот рапорт за проблемите што ќе се јават поради двомесечното затворање на железничката пруга Скопје – Солун. Пред три дена, товарен воз излета од шините кај Поликастро, Северна Грција. Инцидентот предизвика значителна штета на пругата во должина од четири километри, но нема повредени. Се стравува дека станицата Идомени исто така може привремено да биде затворена поради поправки. За да се ублажи прекинот, меѓународниот товарен сообраќај ќе се пренасочува низ Бугарија додека траат поправките, објави Хеленик треин.
Според податоците на Државниот завод за статистика, во третото тримесечје од 2024 година, само 59 илјади патници се возеле со возови, а во железничкиот превоз е забележано намалување на превезениот товар за 9,3 отсто. Според структурата, македонската метална индустрија ќе има најголеми штети, бидејќи најмногу ја користи железницата, па речиси 50 отсто од целиот железнички транспорт, се состои од метали или метални производи со исклучок на машини. Со железницата се превезуваат и опрема и материјали што се користат во транспорт на стока, како и коксот и производи добиени од рафинирање на нафтата. Со возови се транспортираат и хемикалии, хемиски производи, вештачки и синтетички влакна, производи од гума и пластични маси. Извештајот за работењето на МЖ Транспорт за 2022 година покажува дека тие имале околу дваесетина коминтенти за кои превезувале стока.
Стоката, која сега нема да може да превезува со воз, ќе се транспортира со камиони, а тоа ќе ја зголеми работата на македонските транспортери, вели за „Слободен печат“ Билјана Муратовска, генерална секретарка на Асоцијацијата „Макам транс“. Според неа и досега соодносот на превезената стока со железницата виза ви камионскиот превоз, беше 80:20.
– Се надеваме на зголемени нарачки, бидејќи имаме доволно габаритни камиони и автоцистерни, така што сметам дека нема да има проблеми со превозот и дотурот на стока. Солунското пристаниште е појдовна точка за сите увозни транспорти, но ќе се зголемат колоните на границите, бидејќи немаме пруга кон Бугарија, а транспортерите не сакаат да ги зголемуваат своите трошоци – објаснува Муратовска.
Според експертите, речиси 30 отсто од стоката што доаѓа од солунското пристаниште е за Македонија, а пристапот до тоа пристаниште за нас е најидеален. Другите пристаништа што можат да примаат конвенционални и контејнерски бродови се Кавала и Волос, кои се со дополнителни 140 километри од Солун. Како други алтернативни пристаништа во регионот се Бургас на 650 километри и Драч на 300 километри. Министерот за транспорт Александар Николоски си постави цел – да изгради брза пруга и тоа во делот на Коридорот 10, од границата со Србија до границата во Грција.
– Оваа пруга што сега ја имаме е бавна и не ја исполнува целта на брзиот транспорт. Коридорот 10 е стратешки коридор за сите нас и затоа мора да ги искористиме неговите предности. Овој наш план е амбициозен, истовремено е приоритетен проект на кој многу посветено работиме. Паралелно со ова започнуваме со реконструкција и на постојаната пруга за да може и таа да ја биде во функција за да се користи за домашен и меѓународен транспорт – истакна Николоски.
Првиот воз меѓу Скопје и Солун беше пуштен 9 јули 1873 година.
Од 1 април нови европски правила за обработка на царинските податоци
Од 1 април годинава, патните и железничките превозници ќе треба да обезбедат податоци за стоката, испратена до или преку ЕУ пред нејзиното пристигнување, преку целосен електронски документ. Обврската се однесува и на поштенските и на експресните превозници, кои превезуваат стока користејќи ги овие начини на транспорт, како и други страни, како што се давателите на логистика.
Економските оператори што не се подготвени до овој датум, треба да го контактираат Националното сервисно биро на земјата членка на ЕУ (Националната царинска управа) каде што го регистрирале и го добиле својот број EOРИ, за да побараат прозорец за распоредување најдоцна до 1 март 2025 година. Стоката може да биде запрена на границите на ЕУ и може да не биде царинета од царинските органи доколку трговците не ги исполнат барањата за ИЦС2 навреме, објави ЕК.
Системот за контрола на увозот 2 на Европската Унија има за цел да ја подобри безбедноста и безбедноста на стоката што влегува во ЕУ со воведување стандардизиран царински процес пред пристигнување за сите начини на транспорт, вклучително и патен и железнички, а со тоа да се подобри способноста на ЕУ да ги спречи и да се бори против царинските прекршоци.
