Родители на загинатите млади во трагичниот настан во Кочани вчера на протестен собир побараа одговорност од институциите и обвинија дека се соочуваат со притисоци и закани за апсење. На протестот, една од мајките на загинатите деца побара одговори од министерот за внатрешни работи, од директорот на Бирото за јавна безбедност (БЈБ) и од сите надлежни институции. „Кој дозволи нашите ангели да ги убијат? Кој потпишува документи дека нашите ангели се безбедни на јавни и нејавни простори? Сакам одговор од сите институции. Ние како мајки не се плашиме, бараме да ни дадете одговори“, рече таа, додавајќи дека и покрај стравот од можен притвор, нема да се откаже од барањето правда. На прашање зошто мисли дека може да биде притворена, мајката одговори дека слушнала закани дека родителите на малолетните деца кои следниот ден по несреќата демолираа кафуле во сопственост на газдата на импровизираната дискотека, ќе бидат лично гонети.
На прашањето зошто мисли дека ќе ги притворат, таа на новинарите им рече да го прашаат министерот за внатрешни работи Панче Тошковски и Бирото за јавна безбедност. На протестот се обрати и друга мајка, која рече дека болката по изгубените деца е огромна и дека родителите немаат што да изгубат бидејќи ги изгубија нивните најмили, нивните деца. „Единствено што сакаме е правдата да има имиња и презимиња. Дали треба ние родителите да ви помогнеме или сами да ја земеме правдата во свои раце?“, праша таа, додавајќи дека родителите бараат одговорност за сите инволвирани во случајот. Таа ги праша обвинителите што го водат случајот „колку вреди еден млад човечки живот во оваа скапана држава“ и дали толку се безвредни животите на нивните деца за властите да ги пуштаат од притвор осомничените мислејќи на префрлањето во домашен притвор на голем дел од функционерите пред празникот Велигден. Таа посебно се осврна на нејзиниот син Томас Златков, кој е еден од настраданите и чија слика ја држеше во рацете. Го опиша како спортски и ведар млад човек, верен навивач на фудбалскиот клуб Осогово.
„Томи не знаеше, а ни ние не знаевме, дека треба да го заштитиме од злото кое постои во нашиот град“, рече таа. „Не знаевме колку злобни и лоши луѓе има во овој град Кочани, колку се корумпирани и ги убија нашите деца. За овој масакр, мора да одговараат сите соучесници на монструмотт, дали биле прв ред, втор ред, секој до еден, заттоа што ги убија овие млади чесни невини деца“, додаде мајката. Инаку, според анкетата на агенцијата Маркет вижн и интернет порталот Мкд.мк, 53 отсто од испитаниците сметаат дека надлежните институции, МВР и обвинителството брзо и ефикасно преземале мерки за утврдување на одговорноста по трагедијата во Кочани. Од друга страна 33 отсто не се согласуваат со тоа тврдење, 12 отсто рекле дека немаат доволно информации за да одговорат, а 2 отсто не сакале да одговорат.
На 16 март 2025 година, околу 2:35 часот по полноќ, во импровизираната дискотека „Пулс“ во Кочани избувна пожар за време на концерт на бендот ДНК. Во трагедијата загинаа 62 лица, меѓу кои шест малолетници а околу 200 беа повредени. Пожарот беше предизвикан од искри од внатрешни пиротехнички средства од кои се запали таванот што доведе до брзо ширење на огнот и густ чад. Во клубот имало околу 650 лица, иако биле продадени само 250 билети, што значи дека капацитетот бил значително надминат. Во досегашната истрага се осомничени 68 лица, меѓу кои и поранешниот министер за економија кој е во притвор, но и тројцата поранешни градоначалници на градот Кочани, кои се во домашен притвор како и поранешните директори на Државниот пазарен инспекторат. Сегашниот министер за економија, надлежните полициски началници, како и сегашниот директор на ДПИ не се осомничени за овој случај. Извор: Новинска агенција МЕТА
