Опозиционерите обвинија дека во договорот за набавка и изведба на квадратен метар кровен сендвич-панел на пазарот во Неготино е наплатено 10 000 денари, а оти во реалноста неговата цена се движи околу 1 000 денари.
Откако обвини дека пазарот во Неготино е изграден без соодветно одобрение за градба и е класифициран како урбана опрема, опозицискиот СДСМ денеска ја обвини локалната власт на ВМРО-ДПМНЕ во оваа општина дека за изградба на пазарот склучила договор за јавна набавка со фирмата „Мастеф“ во вредност од околу 420 000 евра, петпати повисока од реалната.
Опозиционерите обвинија дека во договорот за набавка и изведба на квадратен метар кровен сендвич-панел на пазарот е наплатено 10 000 денари, а оти во реалноста неговата цена се движи околу 1 000 денари.
„Ова е договорот за пазарот во Неготино, класифициран како ‘урбана опрема’, склучен со една од омилените фирми на ДПМНЕ – ‘Мастеф’ ДООЕЛ, во вредност од околу 420 000 евра. На страна 8 од Договорот, во делот за кровопокривачки работи, стои невидена цифра: за набавка и изведба на квадратен метар кровен сендвич панел е наплатено 10 000 денари. Десет илјади денари за квадрат панел платиле неготинци?! Да не е златен? Да не го набавија од Белизе? Во реалноста, на пазарот, во било кој склад во малопродажба цената на квадратен метар сендвич-панел (со дебелина од 5 сантиметри), со највисок квалитет, се движи околу 1 000 денари. (16 или 17 евра). Да ја додадеме и работна рака – уште 1 000 денари. Вкупна цена се доаѓа до 2 000 денари за квадратен метар. Што значи тоа? Разликата до 10 000 денари е 8 000 денари по квадратен метар, или 130 евра повеќе – за секој квадрат. За вкупно 440 квадратни метри тоа се 60 000 евра разлика – само за покривот!“, велат од СДСМ. Партијата обвини дека се работи за грабеж и ги повика Јавното обвинителство и Државната комисија за спречување на корупцијата (ДКСК) веднаш да постапат. „СДСМ бара итна истрага! Граѓаните заслужуваат одговорност, а не криминални договори“, велат од опозициската партија.
