СДСМ преку соопштение вечерва реагира и ги демантира наводите од објавата од градоначалникот на Струмица од редовите на СДСМ, во врска со „родовата идеологија“. Костадинов денеска во објава на „Фејсбук“ рече дека СДСМ ја препознал загриженоста на јавноста и ја менува својата позиција во однос на „родовата идеологија“. „СДСМ го менува пристапот! СДСМ покажа слух за оправданиот револт на сите нас. Жената мора да биде ставена на прво место, родот тргнат! Останува сега на оние кои хараа и жигосуваа луѓе, држеа прес конференции за тоа колку биле против родови идеологии, а денес допрецизираат закони во кои брутално ја афирмираат родовата идеологија која цел свет ја оттргнува. Срамота, за ВМРО-ДПМНЕ“, напиша Костадинов.
Во реакцијата од СДСМ се истакнува дека партијата ја потврдува својата заложба за градење праведно и инклузивно општество, засновано врз темелните вредности на еднаквост, праведност и солидарност. Социјалдемократските политики се фокусирани на елиминирање на општествените и економските нееднаквости, велат од опозициската партија. „Социјалната правда и недискриминацијата се основни принципи на кои почиваат нашите политики. Само преку системски мерки може да се создаде општество во кое секој граѓанин има еднаков пристап до можности и ресурси“, пишува во соопштението, во кое се вели и дека партијата останува доследна на борбата за родова еднаквост и човекови права, што е докажано низ повеќе реализирани мерки и иницијативи во изминатите години. „Официјалните партиски ставови се утврдуваат преку дискусија и одлуки на соодветните тела и органи. Индивидуалните изјави и ставови надвор од овие рамки не се официјални ставови на партијата“, велат од СДСМ. Партијата порачува дека ќе продолжи со политики насочени кон создавање поправедно и похумано општество, со акцент на заштита на основните човекови права и борба против сите облици на дискриминација.
