Во здравствените домови и во центрите за јавно здравје, сè уште има дози од четиривалентната вакцина, која штити од четири типови на инфлуенца. Во време кога лекарите предупредуваат на интензивни симптоми на вирусот на грип и заболувања слични на грип, а пациентите се жалат дека симптомите им траат со недели, сè уште има на располагање дози од четиривалентната вакцина против грип, која штити од четири типови на инфлуенца. Вакцинацијата започна на 21 октомври лани, а досега (заклучно со шестата недела од сезоната), вакцина примиле вкупно 72.288 лица. „За сезоната 2024/2025 Министерството за здравство обезбеди бесплатна четиривалентна вакцина во вкупна количина од 70.000 дози, а дополнителни 10.000 дози на четиривалентна вакцина се обезбедени преку донација од PIVI (Partnership for International Vaccine Initiatives). Првенствено дозите се наменети за бесплатна вакцинација на ризичните групи, што вклучува лица постари од 65 години, лица со хронични заболувања, здравствени работници, бремени жени и деца од 6 месеци до 5 години“, информираат за Мета.мк од Министерството за здравство. Вакцината против грип може да се дава и кај деца од шестмесечна возраст и постари, а имајќи предвид дека децата до 5 години се една од ризичните групи, Министерството за нив обезбедува бесплатна вакцина.
За граѓаните кои не спаѓаат во овие групи, но сакаат да се заштитат од сезонскиот грип, Центрите за јавно здравје набавуваат комерцијални вакцини, за одреден финансиски надомест. Така, 2.600 дози комерцијални вакцини се набавени од центрите за јавно здравје, како вакцини за останатото население кое не спаѓа во горенаведените групи. Вакцинацијата се спроведува во центрите за јавно здравје со нивните подрачни единици и/или здравствените домови. Закажувањето за бесплатните вакцини се одвива преку веб страната www.vakcinacija.mk. Мета.мк неодамна пишуваше дека плејада од измешани симптоми периодов имаат пациенти кои се обраќаат за помош во ординациите на нивните матични лекари. Висока температура која трае со денови, без други клинички симптоми, а потоа болки во телото, малаксаност, главоболки, па и вртоглавици, кои траат и до четири недели, се причината поради која мноштво пациенти ги полнат ординациите на матичните лекари. „Имаме зголемен број на пациенти со вируси и грипови, кои имаат висока температура и немаат други клинички симптоми, но отпосле имаат главоболки, чусвтвуваат малаксаност која трае долг временски период, од 3 до 4 недели, а знае истото и да им се повтори. Ова е појава и кај малите деца, но и кај возрасните. Она што е карактеристично се вртоглавиците, а потоа следува и изгубеност во однесувањето, подзабораваат, малаксаност и поспаност. Антибиотик не давам при вакви вируси, но им давам инфузија со витамини, оти со тоа добиваат сила и веќе утредента доаѓаат со подобрена клиничка слика“, вели д-р Весна Стојанова Анастасовска, педијатар и семеен лекар во „Медико Марија“. Извор: Новинска агенција МЕТА
