Речиси една четвртина од Британците веруваат дека претседателот на САД, Доналд Трамп, е поголема закана за безбедноста на Велика Британија отколку терористичките организации, според нова анкета објавена денес, пишува „Политико“. Истражувањето на Фондацијата за добар раст покажува дека 24 проценти од Британците веруваат оти Трамп е најголемата закана за националната безбедност, а 22 проценти дека терористичките организации се најголемата закана. Трамп за испитаниците е втората најопасна закана по Русија, од која стравуваат 34 проценти од анкетираните британски граѓани.
Анкетата на JL Partners спроведена помеѓу 14 и 19 март опфатила 2.209 возрасни луѓе во Велика Британија, вклучувајќи и дополнителен примерок од 222 лица кои преминале од Лабуристичката партија во десничарската партија на Најџел Фараџ. Анкетата, исто така, покажа дека речиси половина од Британците очекуваат Трамп да биде товар за економијата на Велика Британија (47 проценти), додека 45 проценти веруваат дека тој ќе наштети на безбедноста и сигурноста на Велика Британија. Меѓу анкетираните, 29 проценти рекле дека блискоста со Трамп е една од најлошите работи кај лидерот на Reform UK, Најџел Фараж, кој минатата недела постигна низа силни резултати на локалните избори.
Претседателот на САД постојано има слаби резултати во анкетите меѓу британските гласачи, а се очекуваат протести пред неговата втора државна посета, објави „Политико“. Британскиот премиер Кир Стармер постојано нагласува дека неговата влада нема да избира помеѓу добри односи со САД или ЕУ, додека Белата куќа се подготвува денес да објави дека е постигнат трговски договор со Велика Британија. Извештајот покажува дека 62 проценти од сите Британци го поддржуваат приклучувањето кон ЕУ наспроти „непредвидливите партнери“, вклучувајќи две третини (67 проценти) од гласачите на Лабуристичката партија во 2024 година и 60 проценти од гласачите кои ја напуштија. Сепак, 50 проценти од оние кои преминале од Лабуристичката партија во партијата Реформа на Велика Британија веруваат дека ЕУ е најсигурен сојузник, а 75 проценти поддржуваат „одредена“ соработка или „многу соработка“ со ЕУ во трговијата и економијата воопшто, пишува „Политико“.
