Американскиот Сенат денеска го потврди Роберт Кенеди Џуниор за секретар за здравство и човечки услуги. За потврдата на Кенеди гласаше тесно мнозинство од 52 наспроти 48 сенатори, пренесе „Гардијан“. Кенеди е контроверзна фигура, а политичките противници го опишуваат како „антиваксер“ и ширач на теории на заговор за безбедноста и ефикасноста на вакцините.
Тој е внук на убиениот претседател Џон Ф. Кенеди и беше независен претседателски кандидат на неодамнешните избори, пред да се откаже од трката и да застане на страната на Доналд Трамп. На денешното гласање, против назначувањето на Кенеди гласаше само еден републиканец – поранешниот републикански лидер во Сенатот, Мич Меконел, кој има преживеано детска парализа, болест која денес е речиси целосно искоренета со помош на вакцините.
