Пожар на руски шпионски брод во близина на сирискиот брег дополнително ја истакна лошата состојба на руската морнарица, додека нејзиното упориште во Средоземното Море е во несигурна ситуација, велат аналитичари и претставници на западните безбедносни служби. Според „Гардијан“, 55-годишниот брод „Килдин“ наишол на проблеми во близина на сирискиот брег минатиот четврток, кога од неговата инка почнале да излегуваат пламени јазици и густ црн чад. Екипажот подигна две црни топки на јарболот, сигнализирајќи дека повеќе немаат контрола над бродот.
Бродот го известил блискиот товарен брод „Мила Мун“, кој плови под знамето на Того, дека не може да маневрира и го предупредил да остане на најмалку 2 километри. Руската екипа се собрала на задната палуба на Килдин и подготвила чамци за спасување, но не повикала помош. По пет часа борба со огнот, Килдин ги рестартирал моторите и продолжил да плови. Според западните безбедносни служби, бродот бил во источниот Медитеран за да ја следи ситуацијата во Сирија по падот на сојузникот на Москва Башар ал Асад во декември. Во исто време, руската морнарица започна со повлекување на воената опрема од делот на пристаништето Тартус под нејзина контрола.
Западни извори тврдат дека пожарот на „Килдин“ и пожарот пред два месеци на руската ракетна фрегата „Адмирал Горшков“ покажуваат дека присуството на руската морнарица во регионот е во лоша состојба и неорганизирано. Додека „Килдин“ беше во неволја, уште два руски воени брода, десантните бродови „Иван Грен“ и „Александар Отраковски“, исто така привремено останаа без навигациска контрола поради пожарот. Мајкл Кофман, експерт за руската војска во Фондацијата Карнеги за меѓународен мир, рече дека проблемите со руските поморски бродови не се нови и не се ограничени само на Медитеранот.
„Руската морнарица историски се соочуваше со проблеми за одржување и оперативна подготвеност. Пожарите не се невообичаени. Операциите дефинитивно носат данок на застарената руска флота, која нема доволно капацитет за одржување и поддршка“, рече Кофман. Овие проблеми би можеле да станат многу посериозни доколку новата власт во Дамаск, Хајат Тахрир ал-Шам (ХТС), ја спречи Русија да продолжи да ја користи базата во Тартус. Досега, Москва успеа да одржи минимално присуство во Сирија по падот на Асад, во Тартус и во воздухопловната база Хмејмим, но долгорочните намери на новата влада кон руските сили остануваат нејасни.
