Со едноминутно молчење започна денешната итна седница на Советот на општина Гази Баба на која се донесе Одлука за доделување на финансиска помош во висина од 1.000.000 денари за помош на семејствата на настраданите во трагичната несреќа во Кочани. Она што можеме во овие тажни мигови за Македонија да го направиме е достоинствено да тагуваме, да бидеме солидарни и да се молиме.
Ова е трагедија каква Македонија досега не памети. Нема граѓанин кој не чувствува болка и не бара одговорност. И јас, како градоначалник, човек, родител чувствувам болка, тага, но силно од мене произлегува и барањето за одговорност со точно име и презиме. Моите мисли се со семејствата на загинатите на кои им е потребна утеха, а моите молитви се со повредените со цел нивно брзо закрепнување! Посакувам никогаш повеќе да не се случи ваква несреќа! Бог да ги прости загинатите и нека почиваат во мир!