Претседателот на Србија Александар Вучиќ со сила ќе се обиде да ги спречи студентските блокади и протести, тоа е сосема јасно после изјавата што пред неколку дена ја даде за „Тв Пинк“ а во која практично најавува масовни апсења на новинари, професори и декани пишува „Нова.Рс“ додавајќи дека тоа практично го потврдил и на собирот од саботата вечерта, каде ги опомена државните органи да ја работат својата работа а во спротивно ќе има последици.
Сега знаат дека се малцинство, знаат дека Србија се разбуди, дека слободарска Србија се разбуди, дека нема да ги трпи повеќе зулумите и дека луѓето сакаат да си ја зачуваат државата. Е сега, со што се соочуваме? Со нивниот страв. Па како деканката на Економскиот факултет ќе помине без одговорност? Како ректорот Ѓоќиќ ќе помине без одговорност? Како тоа мислите дека е воопшто возможно, праша Вучиќ.
Тој потоа најави дека лично ќе поднесел кривична пријава против обвинителот.
Никогаш досега тоа не сум го направил. А против оној обвинител, лично ќе поднесам кривична пријава. Па да видам, нека ја отфрлат и дека речат дека сум јас луд, а тој паметен што не сака да ги гони новинарско блокадерските медиуми кои јаваат на трктори, поради тоа што нивните трактори најверојатно не го загадуваат воздухот, а поголеми им се тракторите од селските домашни трактори. А овие кои ги спасуваа животите на овие деца во Чациленд. И јас сум Чаци и горд сум на тоа, рече Вучиќ на Пинк.
„Запалливата реторика“ на претседателот на Србија продолжи и на собирот „Не ја даваме Србија“.
Нема да отстапиме од барањата што ги изнесовме на собирот во Белград. Тоа се барања во согласност со Уставот и тоа е обврска, само што некој го суспендираше Уставот, а тоа не беа луѓето на власт туку тие што се обидоа да ја одземат државата од институциите, буквално ја одзедоа државата и тоа оние кои имаат задача да ја рушат Србија. Нема да има веќе неказниво блокирање на градското сообраќајно претпријатие, железничките станици и други јавни служби. Дали некои ќе се трудат барањата да не бидат исполнети? Можно, но нема да отстапиме, порача претседателот на Србија. Потоа ги образложи петте барања што државните органи мора да ги исполнат а во спротивно…Заврши шарената револуција, нема да им дадеме ни на овие од надвор ни на овие од внатре да ни ја срушат државата. Можат да се шеткаат колку сакаат, нема ништо од тоа, рече Вучиќ.
Во сличен тон се огласи и претседателката на народното Собрание Ана Брнабиќ.
Србија покажа уште еднаш трпеливост, и тоа победи. Ниедна репресивна мерка не користевме. Сега велиме доста е, студентите мораат да учат, Србија да работи и да надоместиме се што изгубивме последните 5 месеци рече Брнабиќ за РТС.
Додека двајцата ги праќаа овие пораки од телевизии со национални концесии, на терен овие идеи се реализираа. Најпрво уапсен е колумнистот Дејан Илиќ, поради изјава што ја дал за ТВ Нова а потоа на повик на деканот на Медициснкиот факултет во Ниш Александар Митиќ, полицијата упадна на овој факултет и повеќе од 100 студенти и професори даваа изјави во полиција. Потоа адвокатот и функционер на Српска напредна странка Владимир Ѓукановиќ ја повика полицијата да влезе на сите факултети и да ги уапси студентите „блокатори“. Адвокатот Божо Прелевиќ вели дека Вучиќ тргнува во пресметка со вистината.
Мислам дека овде вистината ќе биде најзагрозена, па затоа доаѓа и репресијата кон медиумите, бидејќи нему му пречат медиумите ако ја пренесуваат вистината, вели Прелевиќ за Нова.
Според него, репресијата ќе биде обележје на нова фаза во која Србија е веќе влезена.
Тој продолжува да ги копира студентите. Ако студентите возат велосипед и тој ќе го вози. Ако студентите пешачат и тој ќе најде некои кои пешачат. Ако студентите сакаат протест и тој сака протест. Тоа копирање има свое значење во банализирањето на фактите. Ќе ве потсетам на зборовите на Хана Арент која рекла дека банализирањето на вистината и злото има само еден исход а тоа е да произведе конфузија, во која луѓето нема да знаат повеќе што е добро а што е лошо. Без конфузија тој не може да остане на власт, наведува Прелевиќ.
Според него притисокот што претседателот на Србија го врши врз судството и обвинителството претставува нешто што никогаш не е видено досега.
Власта која има парламентарно мнозинство спроведува државен удар во однос на сопствените судии а она што не се гледа така јасно е дека Вучиќ врши притисок и на генералите од армијата и полицијата кои се лојални на Уставот и законите. Тој презеде се. Вели дека довел трактори, дека сам себе си дозволил да ги посети пациентите а всушност сака да каже ,,јас претседател на Чациленд, сум семоќен и не постои никој од институциите што може да ме спречи“. За него Устав и закони не важат. Пораката што ја праќа е дека знаењето и младоста се негови непријатели. Секој што ќе помисли дека е паметен и дека е иднината, е негов непријател. Се опиша себеси така подробно што не треба ништо повеќе да се додаде. Голема репресија предизвикува и голем одговор. Најпријателски му кажувам, дека постои граница која не смее да ја помине, рече Прелевиќ.
