Министерот Златко Перински се правда дека досега не посетил општина предводена од СДСМ и ДУИ, затоа што немало проект за промоција, но и поради усогласување на тајминзите и на обврските на градоначалниците. На министерот за локална самоуправа Златко Перински „срцето му е дома“ само во вмровските општини затоа што и по два и пол месеци од карванот, не посетил ниту една општина раководена од опозициски градоначалник. Перински, кој е и еден од потенцијалните кандидати на ВМРО-ДПМНЕ за градоначалник на Скопје, иако досега 14 пати бил во општини предводени од владејачката партија, во некои и повеќепати, сепак тврди дека не тера кампања во пресрет на локалните избори наесен. Тој се правда дека досега не посетил општина предводена од СДСМ и ДУИ, зашто немало проект за промоција, но и поради усогласување на тајминзите и обврските на градоначалниците. Тој најави дека в среда ќе направи сефте со посета на скопската општина Центар.
– Реализацијата на капиталните инвестиции во општините со поддршка на финансиски средства од централниот буџет се спроведува преку објавен јавен повик од Министерството за локална самоуправа и сите општини имаат еднакво право да учествуваат и да искористат финансиски средства, во согласност со условите од повикот и критериумите објавени од секое ресорно министерство. Во рамките на првиот повик во 2024 година, 80 општини учествуваа и веќе реализираат проекти. Посетата на проектите се одвива според динамика која е детерминирана од повеќе фактори, и тоа – фаза на реализација на конкретниот проект, усогласеност на агендите на учесниците (премиер, министер за локална самоуправа, ресорен министер и градоначалник на соодветната општината). Според неа, се планираат идни посети на повеќето општини, без политичка селективност на која наведувате во прашањето – одговори Перински за „Слободен печат“, прашан зошто досега не посетил ниедна општина предводена од опозицијата. Тој најави дека утре и во првата недела по Велигден ќе посети три „сдсмовски“ општини, односно ќе им биде гостин на градоначалниците на Центар – Горан Герасимовски, на Крива Паланка – Сашко Митовски и на Берово – Звонко Пекевски.
Перински: Не терам кампања Министерот тврди дека не тера кампања, иако во некои општини бил повеќепати, дека „Каде што срцето е дома“ не му служи за лична промоција во пресрет на изборите и дека граѓаните знаат дека има неселективен пристап, иако досега не бил во ниедна опозициска општина. Главен аргумент му е дека сите 80 општини конкурирале со проекти за пари од унгарскиот кредит.
– Граѓаните многу јасно гледаат дека во креирањето и спроведувањето на политиките за поддршка на локалните самоуправи нема селективност по ниту една основа, а тоа се потврди со фактот дека сите општини, без исклучок, кои поднесоа соодветни проекти на владиниот повик за финансиска поддршка на инфраструктурни проекти, беа земени предвид и им се одобрени средства. Овој пристап важи за сите општини, независно од политичката припадност на градоначалниците. За нас, критериум на политичка основа не постои и нема да постои. Селектирањето се врши на основа на квалитетот на проектите и нивната важност за локалната заедница и нејзините жители – вели Перински. При промоција на карванот „Каде што срцето е дома“ на 7 февруари беше кажано дека
иницијативата е за изворно запознавање со предизвиците и реалните потреби на локалните самоуправи и на граѓаните, со фокус на изнаоѓање соодветни решенија за нивно надминување и поголем напредок. Проектот почна во Општина Аеродром, со фокус на реформите на Законот за локална самоуправа, како и на актуелните проблеми со паркирање, загадување, урбанизација и безбедност во сообраќајот. В.д. градоначалникот на Аеродром Дејан Митески тогаш ја поздрави иницијативата за теренските посети на општините поради измена на Законот за локална самоуправа.
Следниот ден министерот се сретнал со претставници на бизнис-секторот и невладини организации, културни и спортски работници, како и со граѓани. При стартувањето на карванот, немаше ниту збор дека Перински ги планира средбите со градоначалниците поради проектите поддржани од унгарскиот кредит. Сега, пак, министерот, теренските посети ги врзува токму за тие проекти.
Пари има и за опозициски општини – Поддршката за локалните проекти е транспарентна и фер, што значи дека секоја општина има еднаква шанса да добие средства, ако проектите ги исполнуваат зададените критериуми.
Дека ова е реалност, а не само празни зборови, показател се многубројните одобрени и финансирани проекти на првиот повик во општини предводени од градоначалници од редовите на СДСМ. Конкретно, станува збор за вкупно 36 проекти во 15 општини. На Општина Берово ѝ се одобрени девет проекти, по четири проекти на Кривогаштани и Делчево, Општина Пробиштип има одобрено три, а Богданци, Валандово, Дојран, Крушево и Старо Нагоричане по два проекта. По еден проект се финансира во општините Демир Капија, Центар, Паланка, Росоман, Чашка и Чучер Сандево. Нашиот приоритет е и ќе остане обезбедување финансиска поддршка на проекти што ќе го подобрат квалитетот на животот и ќе создадат услови за долгорочен развој на сите општини, без разлика на политичка ориентација на градоначалниците – вели Перински како одговор дека не тера кампања.
Министерот досега посетил само владејачки општини, и тоа еднаш бил во општините Бутел, Ново Село, Василево, Неготино, Чаир, Радовиш, Кисела Вода и во Велес. Во општините Гази Баба и Ѓорче Петров бил трипати и двапати во Аеродром. За реализација на проекти со пари од унгарскиот кредит, Перински повторно бил само во владејачки општини, односно во Тетово, предводена од Билал Касами од Вреди, во Бутел и во Студеничани. Редовно е во друштво на премиерот Христијан Мицкоски. Во Кочани – по изборот на в.д. градоначалник По ужасната трагедија во Кочани каде што во пожар во дискотеката „Пулс“ животот го загубија 61 лице, Перински бил во општината, но службена посета планира по изборот на вршител на должност градоначалник, откако Љупчо Папазов поднесе оставка и е во притвор. – Непосредно по трагедијата бев во Кочани, кое во моментот беше во исклучително тешка, специфична ситуација, моменти на тага и жалост. Од друга страна, службена посета и средба со в.д. градоначалникот и советниците е планирана, откако ќе заврши процедурата за избор на в.д градоначалник кој ќе ја извршува функцијата до локалните избори – вели Перински.
