Нашата посветеност на повредените останува непроменета како во првите часови, како во првите денови. Таа е силна и ќе остане силна во иднина. Сите потреби за здравствена заштита на повредените од трагедијата во Кочани ќе бидат на товар и на сметка и поддржани од страна на државата, односно од Фондот за здравствено осигурување, нагласи директорот на Фондот за здравствено осигурување, Сашо Клековски.Очекуваме во следниов период да дојде експерт за ампутации од Словенија за да се погледнат опциите за третман на повредените кои имаат ампутации на прсти, изјави на прес-конференција директорот на Фондот за здравствено осигурување, Сашо Клековски, зборувајќи за најновите информации во врска со повредените во пожарот во кочанската дискотека.
– Дополнително, за да излеземе во пресрет на потребите на повредените, одобривме контролни прегледи во Пирогов за пациенти кои сакаат да бидат контролирани во Пирогов. Во моментов, тоа се 6 повредени лица. Иако ние апелираме, упатуваме, дека најдобро место за третман е Кочани – нагласи Клековски.
Рехабилитација на Пониква, зголемена хигиена и логистика
Тој рече дека се на пат и дека се консултираат со експерти од Белгија кои беа вклучени во првата фаза, за да направат проценка и да утврдат понатамошни, долгорочни чекори – вклучително и дали постои потреба од лекување во странство во некоја од следните фази на третманот на повредените.
Директорот на ФЗО информираше дека 46 или 48 пациенти се пријавени за првата смена и во петок или во сабота ќе заминат на рехабилитација на Пониква. На Пониква биле извршени дезинфекција, дератизација и дезинсекција на просторот, зголемен бил бројот на хигиеничари од 2 на 5, за максимално чиста околина.
– Нашата посветеност на повредените останува непроменета како во првите часови, како во првите денови. Таа е силна и ќе остане силна во иднина. Сите потреби за здравствена заштита на повредените од трагедијата во Кочани ќе бидат на товар и на сметка и поддржани од страна на државата, односно од Фондот за здравствено осигурување – нагласи Клековски.
Од третман на изгореници, наброја тој, на белодробие, друг тип повреди, физикална терапија, нега, психосоцијална, сè ќе било обезбедено и гарантирано од државата на долги стази.
Процес што ќе трае и ќе се адаптира
Клековски се осврна на сите услуги што сега се достапни во болницата во Кочани.
Станува збор, подвлече директорот на ФЗО, за процес што тече, се адаптира и ќе трае.
– На пример, компресивната облека сега ја користат 58 лица за други делови на телото освен за врат и за лице, за врат и за лице се 8 лица, значи вкупно 66 лица. Ќе трае. Сè уште имаме 10 повредени лица кои се во болници. Имаме уште некои 15 лица на кои најверојатно во наредниот период ќе им бидат земени мерки, значи процесот трае и ќе се адаптира. Морам да кажам, ќе трае 2 години. Препораките за употреба на компресивната облека се до 2 години и во тој период – најмалку на неколкупати, на неколку месеци – ќе треба да се земат нови мерки на таа облека, да се менува, да се адаптира и така натаму – појасни Клековски.
Тој потсети дека британските експерти препорачале физикалната терапија сепак да биде во Кочани.
Тој апелираше да има смиреност кај повредените и кај нивните семејства бидејќи (од Фондот) имаат комплетна посветеност кон нив и се во комуникација со соодветните центри за изгореници.
– Компресивната облека ќе треба да се користи 2 години. Не се препорачува употреба на ласер за третман на изгорениците порано од 6 месеци. Во основа, веројатно ќе треба да помине една или 2 години за да заврши заздравувањето на кожата, пред да почнат естетски зафати за подобрување на изгледот. Ќе замолиме за сите прашања во однос на третманот, повредените да се консултираат со Општата болница – Кочани, со Катерина Мирчовска и со стручниот тим што е формиран таму бидејќи тие ги собираат сите информации што се неопходни – додаде Клековски.
Барањата за вработувања во кочанската болница, нагласи, не се поврзани исклучиво со третманот на повредените.
Им се давала здравствена заштита на сите повредени, без разлика дали имаат здравствено осигурување или не.
Тој кажа и дека дел од потешко повредените се во школска возраст.
– Mислам дека наскоро Министерството за образование и наука ќе излезе со соодветен став за тие, кои се ученици во трета година или биле ученици во четврта година – појасни Клековски, одговарајќи на новинарски прашања.Нема дефицит од лекови за онколошки пациенти, рече тој, одговарајќи на новинарски прашања.
