Наместо стручна и независна личност, се предлага партиски кадар кој не ги исполнува законските услови. Овој потег го загрозува кредибилитетот на телото за заштита од дискриминација и претставува сериозен удар врз владеењето на правото. Мрежата за заштита од дискриминација остро реагира на предлогот на Комисијата за прашања на изборите и именувањата до Собранието за избор на Вецко Здравески како член на Комисијата за спречување и заштита од дискриминација (КСЗД). Изборот е направен нетранспарентно, по партиски клуч, и без почитување на законски утврдените критериуми за стручност, со што директно се урива независноста и легитимитетот на ова клучно тело за човекови права.
Кандидатот Вецко Здравевски не го исполнува критериумот – најмалку седум години работно искуство од областа на човековите права од кои пет години во областа на еднаквост и недискриминација. Од спроведеното интервју со кандидатот, неговото претставување и одговорите на прашањата од јавноста, јасно произлегува дека тој нема релевантно знаење, ниту разбирање на клучните основи за дискриминација. Недостатокот на чувствителност и разбирање на овие теми отвора сериозни сомнежи дека тој би постапувал непристрасно и еднакво кон сите граѓани, особено кон маргинализираните заедници, кои пак, се меѓу најчестите жртви на дискриминација.
https://youtu.be/dcTaIeeqAw8?si=9b_k4CEhuCFzw9PL
Биографијата на кандидатот не содржи никакви докази за експертиза или искуство во областа на еднаквост и недискриминација, што е еден од клучните законски услови за избор во КСЗД. Дополнително, фактот што кандидатот бил член на Комисијата за верификација на факти (Комисија за лустрација) – тело остро критикувано од Европската унија поради злоупотреби, политички мотиви и можни прекршувања на човековите права – е особено загрижувачки. Европската комисија во 2015 година препорача прекин на процесот на лустрација поради неговата идеолошка и селективна примена. Дополнително, Здравески беше обвинет заедно со Антонијо Милошоски во случајот „Моќник“, поврзан токму со делувањето на Комисијата за лустрација. Случајот беше затворен поради застареност на делата, а не поради утврдена невиност.Таквото минато не само што не е квалификација, туку е и сериозен аргумент против неговото именување во тело чија цел е заштита на човековите права. Иако кандидатот не е носител на функција во политичка партија, од неговите изјави во јавност произлегува јасна поврзаност со политичка партија со силно влијание во Собранието.(во 2019, медиумите пренесуваат статус на кандидатот: ВМРО е судбина и иднина за Татковината,a самиот кандидат е ословен како „ветеран на ВМРО-ДПМНЕ“).
Мрежата за заштита од дискриминација бара Собранието да не го изгласа предложениот кандидат. Апелираме да се изберат независни, стручни и квалификувани кандидати кои ги исполнуваат законските критериуми и кои ќе придонесат за унапредување на работата на КСЗД – во интерес на сите граѓани и во согласност со европските вредности и правниот поредок.
