Од „Соравија Инвест“ соопштија дека се запознаени дека трговскиот центар е во процес на извршување и дека е закажано јавно наддавање. Од таму информираат дека „активно ги бараат сите правни процедури и акции за да се запре најавеното извршување и лицитација на имотот“. Истовремено, како што велат, утврдуваат дека овој процес на заплена е инициран незаконски и еднострано од повеќе доверители во наводен дослух со поранешното раководство на зградата. Два дена откако „Фокус“ објави дека деловниот центар „Соравиа“ се продава преку извршител со почетна цена од 22,4 милиони евра поради долг кон бугарската „Прва Инвестициона Банка“, денеска официјално се огласија од „Соравиа Инвест“, компанија во чија сопственост е атрактивниот објект во центарот на Скопје, кој влезе во фокусот на јавноста поради процесот на промена на сопственичката структура, во што вклучен беше Дрин Ахмети, внук на Али Ахмети. Од „Соравија Инвест“ велат дека се запознаени со неодамнешните вести дека трговскиот центар е во процес на извршување и дека е закажано јавно наддавање во текот на месецов. Но, воедно ги увераат сите нивни деловни станари и пошироката јавност дека секојдневното работење во центарот останува нормално и непречено. Воедно, од таму известија за ребрендирање.
„Бизнис центар „Соравија“, „Соравија Инвест“ го ребрендира во „Кула Валхала“, најсовремен нето-нула деловен центар. Ова ново име го означува почетокот на новото поглавје за значајната зграда. „Кулата Валхала“ ќе биде модерен деловен центар и ќе ги исполнува високите стандарди за енергетска ефикасност и одржливост“, велат од компанијата. Од таму информираат дека „активно ги бараат сите правни процедури и акции за да се запре најавеното извршување и лицитација на имотот“. Истовремено, како што велат, утврдуваат дека овој процес на заплена е инициран незаконски и еднострано од повеќе доверители во наводен дослух со поранешното раководство на зградата. Според нив, оваа акција е преземена без соодветна основа или согласност од сегашните вистински сопственици.
„Како дел од нашата енергична одбрана на нашите сопственички права, официјално е поднесена кривична тужба до Јавното обвинителство за организиран криминал и корупција. Оваа правна постапка бара целосна истрага за околностите околу обидот за извршување. Прикажавме докази и наводи дека процесот на аукцијата е резултат на недозволени и дослухни активности и ги повикуваме властите темелно да ја испитаат оваа работа“, велат од компанијата.
ШТО ОБЈАВИ „ФОКУС“?
Инаку, завчера ја објавивме веста дека деловниот центар „Соравиа“ е ставен на продажба. Имено, извршителот Андреја Буневски кон крајот на март донел заклучок за усна јавна продажба на недвижниот имот во рамки на деловниот комплекс „Соравиа“, врз основа на барањето за спроведување на извршување во вредност од 930.425 евра од страна доверителот „Прва Инвестициона Банка“ со седиште во Софија, Бугарија, засновано на извршна исправа Солемизација на договор за залог од 02.09.2022 година против должникот „Соравиа Инвест“. Во заклучокот таксативно се наведува недвижниот имот што оди на продажба, која ќе се одржи за дваесетина дена, односно на 24 април. Притоа, почетната вредност на недвижноста, утврдена со заклучок на извршителот Буневски, изнесува 1.377.978.526 денари или околу 22,4 милиони евра, под која недвижноста не може да се продаде на првото јавно наддавање. Дополнително, во заклучокот стои дека на јавното наддавање може да учествуваат само лица кои претходно положиле гаранција во висина од една десетина од утврдената вредност на недвижноста, односно во износ од 137.797.853 денари или околу 2,2 милиони евра. Најповолниот понудувач е должен да ја уплати сумата во рок од 15 дена, или во спротивно ќе се закаже нова продажба. Даночните обврски по основ на продажбата паѓаат на товар на купувачот.
„Должникот кој како сопственик домува во продадената семејна станбена зграда или стан не го задржува правото да домува тука и е должен зградата, односно станот да ги испразни во рок од 30 дена од денот на доставувањето на заклучокот за предавање во владение на недвижност, а ако тоа не го стори, извршителот на предлог на купувачот присилно ќе го изврши испразнувањето на зградата, односно станот“, стои, меѓу другото, во заклучокот. Во него е опишан недвижниот имот што оди на продажба преку 23 точки, со кои всушност е опфатен имот кој се наоѓа на 2 катастарски парцели во рамки на катастарска општина Центар 1. Тоа се КП 12082/2, со која е опфатен најголем дел од објектот „Соравиа“, но помал дел од имотот што го поседува „Соравиа Инвест“ преку имотен лист 44990 отпаѓа и на соседната КП 12070 – голема парцела каде влегува соседниот Градски трговски центар. Станува збор за земјиштето под објектот „Соравиа“ од 1.333 квадратни метри и внатрешна површина означена како деловна зграда во стопанство со вкупна квадратура од 13.661 квадрати. Покрај тоа, тука влегуваат и т.н. деловни простории од вкупно 3.241 квадрати, помошни простории од типот на тераса и балон од вкупно 480 квадрати, како и гаражи од вкупно 5.408 квадрати. Севкупно, се работи за недвижност од 22.790 квадрати, која месецов оди на продажба за почетна цена од 22,4 милиони евра.
Сепак, треба да се посочи дека оваа недвижност има низа товари, така што во 2021 година е заснован договор за залог во корист на „Прва Инвестициона Банка“ за износ од 14 милиони евра, а во следната 2022 година е заснован нов договор во корист на бугарската банка од 945.000 евра, додека годинава пристигнуваат и неколку налози за извршување кај повеќе извршители. Токму вториот договор со софиската банка претставува основ за поведување на извршна постапка, но долгот кон овој субјект е далеку поголем ако се земе во предвид првиот милионски договор. Меѓутоа, тие обврски се направени пред 2023 година, кога започна операција за промена на сопственичката структура. Како што е познато, тогаш беше обелоденето дека албанската „Пе-Вла-Ку“ и домашната „Тхор Индустриес“ во сопственост на Дрин Ахмети, внук на лидерот на ДУИ, ќе го преземат деловниот објект „Соравиа“ од Хано Соравиа. Иако „Соравиа“ се уште е во формална сопственост на Австриецот Соравиа, сепак, неодамна во интервју на КОД Ахмети твреше дека тој оперира и раководи со центарот.
Според Бизнис мрежата, споменатата „Соравиа Инвест“ е во сопственост на „Ханно Соравиа ГмбХ“ и плус на еден субјект – „Реитергут ХС ГмбХ“. Ист сопственик има и поврзаната „Соравиа Менаџмент“, а во двете друштва како управителка се јавува Егзона Ризмани (соуправител на „Соравиа Менаџмент“ е и бугарскиот државјанин Валери Русев Атанасов). Моментално, Ризмани е управителка и на подружницата на албанската „Пе-Вла-Ку“, а порано била управителка и на „Тхор Индустриес“ на Дрин Ахмети, кој, пак, неодамна беше управител на „Соравиа Инвест“. Во моментов, „Соравиа Инвест “ и Соравиа Менаџмент“ имаат блокирани банкарски сметки и долгови кон УЈП, кој изнесуваат 11.825.210 денари по основ на ДДВ, а истиот долг го имаат и поврзаните „Соравија Вилиџ Рисорт“ и „Соравиа Лејк Рисорт“, каде фигурира и Русев Атанасов. Исто така, блокирана банкарска сметка имаат и „Пе-Вла-Ку“ и „Тхор Индустриес“. Додека се уште трае предистрагата за случајот „Соравиа“, фирмата на помладиот Ахмети остана без лиценца за изведба на објекти.
