По иницијатива на претседателот на опозициската СДСМ и пратеник во Собранието, Венко Филипче се одржа прва средба со македонскиот премиер Христијан Мицкоски во Владата, на која беше разгледан предлогот за нов модел на политичка соработка насочена кон решавање на клучните прашања од интерес на граѓаните. По завршувањето на средбата, Филипче изјави дека имале добар и конструктивен состанок со премиерот. „Јасно е дека до него стигна пораката, барањето на граѓаните за некаква форма на заедничка работа во сфери коишто се битни за подобрување на квалитетот на нашето живеење”, изјави Филипче по средбата. Како што појасни тој, на средбата начелно е договорено формирање заеднички тела или работни групи кои ќе работат на спроведувањето на реформската агенда. Првичниот фокус ќе биде на законите поврзани со правосудството, енергетиката и стратешките проекти во здравството, кои треба да стигнат во Собранието. Претседателот на СДСМ истакна дека во иднина очекува и другите политички партии да се приклучат на овој модел на соработка.
На средбата, Филипче и Мицкоски разговараа и за уставните измени поврзани со евроинтеграциите, каде што, според Филипче, постојат различни позиции. „За ова останува да зборуваме понатаму”, рече Филипче. Македонскиот премиер Христијан Мицкоски на социјалните мрежи објави дека се состанал со претседателот на СДСМ, Венко Филипче. „Средба каде разговараме за актуелните случувања, и од која сакам да се знае дека одговорност, мудрост и чесност и се повеќе од потребни на Македонија!“, напиша Мицкоски во објава на Фејсбук.
View this post on Instagram
