При формирањето на ВЛЕН бил постигнат договор сите партии да имаат партнерски однос, но пред неколку месеци Арбен Таравари почнал да го преиспитува овој договор, сметајќи дека неговото влијание е поголемо и тоа треба да се почитува. Па, главното прашање што сега се поставува е дали Таравари сака редефинирање на односите во рамки на ВЛЕН, со тоа што нема сите 4 субјекти да бидат рамноправни, туку тој би бил доминантен фактор? Или, пак, прави терен за вртење кон ДУИ на Али Ахмети? Предизборната одлука на Арбен Таравари да стане дел од веќеформираната коалиција на Изет Меџити, Биљал Касами и Африм Гаши беше клучна за изборниот исход во албанскиот политички блок на последните парламентарни избори, бидејќи ВЛЕН со Таравари успеа да постигне солиден резултат, со можност да го толкува како изборна победа. Во спротивно, доколку Таравари не се разидеше со Зијадин Села, нивната Алијанса за Албанците ќе беше далеку посилен и постабилен партнер на ДУИ во т.н. Европски фронт, кој без никакви дилеми би излегол како убедлив изборен победник.
–Јас мислам дека имаме многу недостатоци. Тоа не е толку до премиерот Мицкоски, колку што е до нас. Постои некаква неусогласеност што се гледа од 100 километри, дека многу бавно функционираме. Впечаток е на народот, што е најлошо за нас, дека ВЛЕН има многу слаба позиција во Владата… Впечатокот на околу 70 отсто од населението Албанци е дека ВЛЕН не функционира добро – рече тој. Според информации на „Фокус“, при формирањето на ВЛЕН сите политички партии се договориле да функционираат на партнерска основа, бидејќи проценката била дека вредноста на секоја од партиите е далеку поголема во еден сојуз, отколку што би била доколку сите тие самостојно делуваат на политичката сцена.
Меѓутоа, пред неколку месеци Таравари почнал да го преиспитува партнерскиот однос, кој предвидува уделот на сите четири партии да биде 25 проценти, па почнал да бара да има поголемо влијание. Како што дознаваме, тој и на партнерите во ВЛЕН и на партнерите во Владата им рекол дека не може сите да бидат исти, кога тој и неговата партија имаат најголем рејтинг и тежина. Во неговите јавни настапи, тој негираше дека барал 40 отсто на советничките листи за локалните избори, меѓутоа нашите извори велат дека тој јасно предочил дека кога веќе ВЛЕН функционира како коалиција тогаш неговиот дел треба да биде поголем, т.е. 40 отсто, додека останатите 3 партии да имаат по 20 отсто. Плус, тој барал негови кандидати за градоначалници во повеќе општини. Освен во Гостивар и Врапчиште, кои се сметаат за негови упоришта, додаваат нашите соговорници, тој ги барал и Струга, Сарај, Липково и една од Боговиње и Теарце, што практично го нарушува балансот во рамки на коалицијата. Дел од сегашните соработници на Таравари сметаат дека ова однесување е во насока да стане главен во ВЛЕН, но дел од нив веруваат дека е во дослух со Ахмети, бидејќи имале информации дека истото го побарал и од него. –Нервозата на Таравари е производ на неколку причини. Тој е незадоволен од малку стеснетиот простор за работа што го има како министер, но особено поради неговата улога во ВЛЕН, која смета дека треба да биде многу поголема, бидејќи има највисок рејтинг. Но, една од неговите најголеми болки е Гостивар, бидејќи има ризик таму да загуби, особено ако се земат во предвид резултатите на последнтие избори – вели висок владин функционер. Инаку, на последните двојни избори Таравари беше претседателски кандидат на ВЛЕН и загуби во родниот Гостивар од Бујар Османи од ДУИ. Што се однесува на парламентарните избори, кои се одржаа со вториот круг од претседателските избори, пак, ВЛЕН пак загуби во Гостивар, но победи во Чаир и Тетово, кои се бастиони на Меџити и Касами.
Оттука, нашите соговорници велат дека Таравари стравува дека на локалните избори ВЛЕН може да загуби во Гостивар, што донекаде би го делегитимирало, особено ако повторно во своите средини победат Меџити и Касами. Токму затоа Таравари заговара четирите партии од ВЛЕН да настапат посебно или во два блока, бидејќи така до израз ќе дојде дека тој е најсилен играч во коалицијата според освоените гласови на листите, а нема да дојде до израз неговиот потенцијален пораз во Гостивар. Но, такво сценарио најмногу ќе и користи на ДУИ. Од друга страна, пак, тој одбива да се конфронтира со ВМРО-ДПМНЕ, бидејќи, според упатените, сака да остане дел од Владата и истовремено ја сака поддршката на ВМРО-ДПМНЕ во трката за градоначалник на Гостивар на неговиот кандидат. Како што e познато, етничките Македонци може да го одредат победникот при тесна трка во Гостивар, а најголем дел од нив инклинираат кон десницата. Доколку на крајот ВЛЕН настапи заедно на избори и коалицијата загуби во Гостивар, што би се сметало за пораз на Таравари, тоа може да ги доведе во прашање и неговите амбиции да стане лидер на ВЛЕН, бидејќи одамна е најавено дека после изборите ќе започне процесот на трансформација на ВЛЕН од коалиција во партија. А, доколку не успее да стане доминантен во ВЛЕН, тогаш никој не исклучува дека тој може да почне да се врти кон ДУИ. Неофицијално, интегративците преку „стројници“ веќе се обиделе да го растурат ВЛЕН преку Меџити и Касами, а сега последно се обидуваат и со Таравари. Доколку ДУИ успее да го искористи негово незадоволство од ситуацијата во ВЛЕН и го привлече со тоа што ќе му ги отстапи бараните општини, нејасно е како на тоа ќе реагира Села, кој неодамна рече дека Таравари е добар доктор, но дека е „даска за политика“. „Фокус“ се обиде да стапи во контакт со Таравари, кого го прашавме дали смета дека неговото влијание во ВЛЕН е поголемо од она на партнерите, дали смета дека тој треба да има поголем удел при носење на одлуките во рамки на коалицијата, дали смета дека ВЛЕН треба да прерасне во една партија и дали има амбиција да биде лидер на таа партија? Одговор не добивме. За потсетување, формирањето на ВЛЕН го спонзорираше косовскиот премиер Албин Курти, кој имаше улога на еден вид олеснувач со чија помош се надминаа разликите меѓу четирите партии. На неодамнашната ифтарска средба на лидерите на ВЛЕН во Приштина, дознаваме дека Курти инсистирал коалицијата да остане на купче и бил критичен кон однесувањето на Таравари. Арно ама, во спротивна насока делува албанскиот премиер Еди Рама.
