Најмалку 21 лице загина откако неколку торнада опустошија делови од две американски сојузни држави, Мисури и Кентаки. Официјалните лица во Кентаки пријавија 14 смртни случаи како резултат на лошите временски услови, а во Мисури загинаа седум жители, од кои петмина во градот Сент Луис. Торнадо утринава го погоди и округот Лорел во Кентак, во југоисточниот дел од државата. Официјалните лица стравуваат дека бројот на жртви би можел да биде поголем.
Властите на Мисури објавија дека 5.000 згради биле оштетени по торнадото што започна во петокот, при што цели покриви биле уништени, а далноводи биле урнати. Во Сент Луис околу 100.000 домаќинства останаа без струја. Властите во Кентаки пријавија неколку тешко повредени жители. Противпожарната служба на Сент Луис објави дека започнала операција за спасување на три лица откако се урна дел од блиската црква, но едно од нив им подлегнало на повредите. Во двете области каде што беше направена најголема штета е воведен полициски час од 21 часот. до 6 часот наутро по локално време., со цел да се спречат потенцијални повреди од урнатини и да се намали можноста за грабежи. Националната метеоролошка служба на САД објави дека торнада ја погодиле и соседната држава Илиноис.
