Според 22. амандман од Уставот на САД, никој не може да биде избран на функцијата претседател повеќе од двапати. Претседателот на Соединетите Американски Држави, Доналд Трамп, изјави дека не планира да се кандидира за трет претседателски мандат, иако во последните недели кружат шпекулации.
„Ќе бидам претседател осум години, претседател со два мандата. Секогаш мислев дека тоа е важно“, рече Трамп во интервју за Ен-Би-Си. Претходно беше познато дека Трамп изјави дека би сакал трет, па дури и четврти мандат, а подоцна тврдеше дека го кажал ова за да ги провоцира медиумите, кои ги обвинува за ширење лажни вести. Сепак, фактот дека Организацијата Трамп веќе некое време продава капи со натпис „Трамп 2028“ ги поттикна шпекулациите за неговите идни политички амбиции.
„Толку многу луѓе ме молат да го направам ова“, рече Трамп, само неколку дена откако одбележа 100 дена од неговиот втор мандат. Како што истакна, ова е нешто што не е дозволено. „Не знам дали е уставно или не“, додаде тој, осврнувајќи се на забраната за трет мандат. Трамп спомена и некои имиња што ги гледа како можни наследници – потпретседателот Џ.Д. Венс и државниот секретар Марко Рубио.
„Мислам дека четири години се сосема доволни за да се направи нешто спектакуларно“, додаде тој. Според 22. амандман од Уставот на САД, никој не може да биде избран на функцијата претседател повеќе од двапати. За промена на тоа правило би било потребно двотретинско мнозинство во двата дома на Конгресот и одобрение од три четвртини од државите. И покрај ова, некои поддржувачи на Трамп веруваат дека постои дупка во законот, иако тоа е толкување кое никогаш не е тестирано на суд. На прашањето дали некој се обидел да го убеди во таа теорија, Трамп избегна конкретен одговор, велејќи дека многу луѓе му кажале различни работи.
