Примери за погодени договори, според федерална база на податоци, вклучуваат договор со Националниот институт за здравство вреден 49.858 долари за истражување на ефектите од консумацијата на кафе и договор од 25.800 долари со Одделот за домашна безбедност за обука на високи извршни лица. Некои од договорите со Харвард можеби веќе биле предмет на наредби за прекин на работа. Администрацијата на Трамп планира да ги откаже преостанатите федерални средства со Универзитетот Харвард – во вредност од околу 100 милиони долари, според писмото што треба да биде испратено до федералните агенции. Во писмото исто така се наложува на агенциите да „пронајдат алтернативни добавувачи“ за идните услуги, Њујорк Тајмс.
Дополнителните планирани кратења, наведени во нацрт верзијата на писмото до која дојде медиумот The New York Times, претставуваат, според еден претставник на администрацијата, целосно прекинување на долготрајната деловна врска меѓу владата и Харвард. Ова писмо е последен пример за решеноста на администрацијата на Трамп да го доведе Харвард — веројатно најелитниот и културолошки највлијателен универзитет во САД — до колена, преку поткопување на неговата финансиска стабилност и глобално влијание. Од минатиот месец, администрацијата замрзна околу 3,2 милијарди долари во грантови и договори со Харвард. Таа исто така се обиде да ја запре способноста на универзитетот да запишува меѓународни студенти. Последното писмо, датирано на 27 мај и испратено од Американската служба за општи услуги (G.S.A.), треба да биде доставено во вторникот наутро до федералните агенции, според претставник на администрацијата кој зборуваше анонимно бидејќи не бил овластен да дискутира за внатрешни комуникации.
Писмото наложува агенциите да одговорат до 6 јуни со список на договори кои треба да се откажат. Договорите за услуги што се сметаат за критични нема веднаш да се раскинат, туку ќе бидат префрлени на други добавувачи, според писмото потпишано од Џош Груенбаум, комесар на федералната служба за набавки при G.S.A., која е одговорна за набавка на стоки и услуги за владата. Договорите со околу девет агенции би биле засегнати, според истиот владин претставник. Примери за погодени договори, според федерална база на податоци, вклучуваат договор со Националниот институт за здравство вреден 49.858 долари за истражување на ефектите од консумацијата на кафе и договор од 25.800 долари со Одделот за домашна безбедност за обука на високи извршни лица. Некои од договорите со Харвард можеби веќе биле предмет на наредби за прекин на работа. „Во иднина, исто така ве охрабруваме вашата агенција да бара алтернативни добавувачи за услуги каде претходно сте го разгледувале Харвард“, стои во писмото. Администрацијата ги претстави своите потези против Харвард како борба за граѓански права. Таа го обвини универзитетот за либерална пристрасност, за продолжување со употреба на расни критериуми при упис и покрај забраната од Врховниот суд, и за толерирање на антисемитско однесување на кампусот.
Универзитетот во Кембриџ, Масачусетс, пак, ја претстави оваа борба како напад врз своите права од Првиот амандман, обвинувајќи ја администрацијата на Трамп дека се обидува да има контрола врз неговиот кадар, наставната програма и уписната политика. Сочен со барања од владата кои вклучуваа забрана за студенти „непријателски настроени кон американските вредности“, ревизија на политичката идеологија на студентите и професорите за да се обезбеди „разновидност на гледишта“, и квартални извештаи до администрацијата, Харвард енергично се спротивстави пред федералниот суд. Во една тужба, поднесена минатиот месец, Харвард бара враќање на над 3 милијарди долари федерално финансирање. Во друга, поднесена минатата недела, бара федералниот суд да му ја врати можноста за запишување меѓународни студенти. Минатата недела, судијката Алисин Д. Бароугс привремено ја врати оваа можност, а во четврток ќе се одржи сослушување за да се утврди дали таа одлука ќе биде продолжена.
За време на својата кампања за втор мандат, претседателот Трамп ги нападна елитните универзитети како контролирани од „марксистички манијаци и лудаци“ и вети дека ќе ги зголеми даноците на профитот од нивните фондови. Овој план беше одобрен овој месец од Претставничкиот дом. За да стапи на сила, потребно е одобрување од Сенатот. Новата даночна одредба би го чинела Харвард, чиј фонд изнесува 53 милијарди долари, околу 850 милиони долари годишно. Харвард најмногу ја почувствува офанзивата на Белата куќа против високото образование. Администраторите и професорите со зголемена загриженост го следат секој нов декрет што ја поткопува финансиската основа на универзитетот. Универзитетот има околу 6.800 меѓународни студенти, кои претставуваат 27 проценти од вкупниот број запишани. Претседателот на Харвард, Алан М. Гарбер, го опиша укинувањето на можноста за запишување меѓународни студенти како потенцијално катастрофален удар. „Оваа незаконска и неоправдана одлука ја осудуваме“, напиша д-р Гарбер во изјава минатата недела, додавајќи дека таа „го загрозува животниот пат на илјадници студенти и научници низ Харвард и служи како предупредување за безброј други на колеџи и универзитети низ земјата кои дошле во Америка за да се едуцираат и да ги остварат своите соништа.“
Писмото од администрацијата на Трамп наведува дека Харвард покажал „недостаток на посветеност на недискриминација и на нашите национални вредности и приоритети.“ Како доказ, писмото наведува дека „Harvard Law Review“, независно списание управувано од студенти, неодамна доделило стипендија на студент по право кој бил обвинет дека нападнал еврејски студент за време на протест поддршка за Палестина во 2023 година. Студентот избегнал кривично гонење за прекршочно обвинение за напад и се согласил да изврши општествено корисна работа, но не признал вина. Во писмото исто така се тврди дека Харвард не се придржувал до одлуката на Врховниот суд од 2023 година, која забрани користење на расата како одлучувачки фактор при упис. Но, процентот на црни студенти на прва година опаднал на 14 проценти во есен 2024, од 18 проценти една година претходно. Во истиот период, запишувањето на црни студенти на Правниот факултет на Харвард паднало на 3,4 проценти – најниско ниво од 1960-тите. Во писмото не се наведуваат статистички докази за ова тврдење, но се споменува воведувањето на курс по поправна математика, за кој се вели дека бил резултат „на користење на дискриминаторски фактори наместо заслуги при уписните одлуки“. Извор: Новинска агенција МЕТА
