Американскиот претседател ги „замрзна“ царините на 90 дена, но ги зголеми за Кина на 125% со моментален ефект, а по овие објави, индексите на Волстрит забележаа големи добивки Мнозинството демократи во американскиот Конгрес, како и играчи на пазарот, аналитичари и новинари, изразија многу сериозни сомневања дека со поттикнувањето на купување на берзата непосредно пред неговиот спектакуларен пресврт во средата, американскиот претседател незаконски манипулирал со пазарите.
– Дали соработниците на Трамп незаконски профитираат од огромните промени на берзата преку инсајдерски тргување? – праша сенаторот на Демократската партија од Калифорнија, Адам Шиф, – Конгресот треба да знае – рече тој повикувајќи на конгресна истрага.
– Претседателот на САД незаконски учествува во најголемата пазарна манипулација во светот – се вели во соопштението на членовите на Комитетот за финансиски услуги на Претставничкиот дом.
По отворањето на глобалната трговска војна и потресувањето на пазарите, американскиот претседател на „Трут сошал“ (TruthSocial), неколку минути пред отворањето на Волстрит, напиша „Време е за купување“. Неколку часови подоцна, тој најави 90-дневна суспензија на воведувањето дополнителни царини против десетици земји, со исклучок на Кина, што предизвика историски пораст на берзите. По неколкудневниот пад, индексот Дау Џонс се затвори на 7,87%, што е негово најголемо остварување од 2008 година, а индексот Насдак забележа раст од 12,16%, што е раст без преседан од 2001 година. Етички експерт, исто така, коментираше дека има причина за истрага.
– Претседателите не се инвестициски советници – напиша на Икс Ричард Пејнтер, професор по право и поранешен адвокат за етика во Белата куќа за време на Џорџ В. Буш.
– Овој случај може да го изложи претседателот на обвиненија за пазарна манипулација – изјави тој за Ен-би-си.
Белата куќа увери дека Доналд Трамп само сака да прати смирувачка порака.
– Одговорност на претседателот на Соединетите Држави е да ги увери пазарите и Американците за економската безбедност во услови на постојано медиумско алармирање – изјави портпаролот на Белата куќа Куш Десаи за „Вашингтон пост“.
Доналд Трамп ја потпиша својата контроверзна објава на „Трут сошал“ со буквите ДЈТ, кои се иницијалите на неговото име, но и кратенката на неговата медиумска компанија Трамп медиа & технолоџи груп. Акциите на ДЈТ на берзата резултираат со добивка од 21,67%! Концептот на инсајдерско тргување се однесува на купување или продажба на акции или други финансиски инструменти од страна на поединци што поседуваат нејавни, материјални информации за компанијата. Оваа практика се смета за нелегална, бидејќи обезбедува неправедна предност во однос на другите инвеститори и ја поткопува довербата на финансиските пазари. Кина во средата поднесе нова жалба до Светската трговска организација, откако претходно до ова тело го извести дека американските царини за Пекинг се „непромислени“ и се закануваат дополнително да ја дестабилизираат глобалната трговија.
„Ситуацијата опасно ескалира…Како една од погодените членки, Кина изразува голема загриженост и цврсто противење на овој непромислен потег“, се вели во соопштението на Кина до СТО, испратено до Ројтерс од кинеската мисија во Женева. „Иако Кина се противи на трговските војни, таа цврсто ќе ги брани своите легитимни интереси“, се вели во соопштението до членките на СТО за време на состанокот за трговија со стоки. Претседателот Доналд Трамп побара од Американците огромна вера и трпение додека се впушта во економска игра со царини. Царините што стапија на сила преку ноќ, ја потресоа берзата и наскоро би можеле да ги зголемат цените на многу стоки за кои Американците плаќаат – по години на постојана инфлација.
Извесно е дека за да функционира играта со царини, луѓето мора да бидат подготвени да издржат недели или дури месеци на пораст на цените и други тешкотии и во однос на нивните инвестиции, пред да започнат придобивките што ги најавува Трамп.
