Претседателот на САД Доналд Трамп најави нов начин на стекнување американско државјанство: „златна карта“ која ќе чини пет милиони долари, пренесува „Блумберг“. „Ќе ставиме цена на таа картичка од околу пет милиони долари и тоа ќе ви даде привилегии за зелена карта [постојано жителство], а тоа ќе биде пат до државјанство“, рече Трамп додавајќи дека „картичката“ ќе биде „донекаде како зелена карта, но на повисоко ниво на софистицираност“.
„Богати луѓе ќе дојдат во нашата земја со купување на оваа картичка. Тие ќе бидат богати и ќе бидат успешни и ќе трошат многу пари и ќе плаќаат многу даноци и ќе вработат многу луѓе. И мислиме дека тоа ќе биде исклучително успешно и никогаш претходно не било направено“, рече американскиот претседател пред новинарите во Овалната соба во Белата куќа.
Продавањето државјанства и пасоши обично го прават многу помали и многу посиромашни земји од САД. Во минатото, во Европа познати по ваквата пракса беа Кипар, Малта и Црна Гора, како и други земји. Критичарите на „златните пасоши“ велат дека тие дозволуваат влегување на капитал со сомнително потекло во една земја и дека привлекуваат богати луѓе кои заработиле на нечесен начин и бараат решение за да ги исперат украдените пари. Секретарот за трговија Хауард Лутник појасни дека администрацијата на Трамп планира да ја прекине сличната програма за имигрантски инвеститори EB-5 и „да ја замени со златната картичка на Трамп“. Програмата би можела да започне за две недели. Лутник ја опиша програмата ЕБ-5 како поевтин начин за добивање зелена карта, додавајќи дека според новиот систем, поединците кои ги исполнуваат условите ќе можат да ѝ платат пет милиони долари на американската влада.
„Тие ќе мора да поминат низ проверка, се разбира, но за да се уверат дека се глобални граѓани од светска класа, тие можат да дојдат во Америка“, рече Лутник. Запрашан дали руските олигарси ќе има право на „златна карта“, Трамп одговори: „Да, веројатно. Познавам некои руски олигарси, тие се многу фин народ“. Инвеститорската виза EB-5 моментално дава зелена карта на оние кои инвестираат минимум 800.000 американски долари во американско комерцијално претпријатие кое создава најмалку десет работни места за американски граѓани.
