Во 2019 година загинаа 16 патници во неисправен автобус кај Ласкарци, во 2021 година, за време на ковид-кризата, изгореа 14 пациенти во модуларната болница во Тетово, а неколку месеци подоцна – 45 патници во автобус во Бугарија, кој поминувал граница со лажна лиценца. По неколку години низ судските лавиринти, за овие трагедии нема ниту еден правосилно осуден виновник. Додека се чека правда за овие несреќи, се случи најголемата трагедија во поновата историја. На 16 март, во импровизирана дискотека загинаа 59 млади луѓе. Несреќата за Ласкарци пред Апелација. Несреќата кај Ласкарци беше една од првите трагедии кога автобусот на „Дурмо турс“ изгуби контрола и падна во дупка покрај автопат. Деца не ги дочекаа родителите да се вратат од работа, а родители не ги дочекаа децата да се вратат од Скопје. Сопственикот на „Дурмо турс“, Дурмиш Белули, своите автобуси ги прегледувал во станица за технички преглед која е во негова сопственост. Законот тоа му го дозволувал оти биле различни правни субјекти, иако фирмите имале ист сопственик.
На техничкиот преглед пред несреќата било утврдено дека сопирачките на автобусот функционираат делумно. Пет години по несреќата обвинетите не се правосилно осудени. На 25 јануари 2024, Кривичниот суд донесе првостепена пресуда со која на вкупно 39 години затвор ги осуди обвинетите. Возачот на автобусот Маноил Трифуновски доби најмногу – 14 години, а сопственикот на „Дурмо турс“, Дурмиш Белули – четири години, најмалку од сите обвинети. На шест години беше осуден Ремзи Мифтари, шеф на возниот парк на „Дурмо турс“, а на пет години затвор тројца вработени во техничкиот центар на истоимената фирма. Според одговорот што го добивме од Апелацискиот суд, предметот за „Дурмо турс“ од изрекувањето на првостепената пресуда каде што се постапува по жалби повеќе од една година се препраќа меѓу судовите и Вишото јавно обвинителство. На 2 април и 3 април ќе има јавни седници за предметот и се очекува првата правосилна пресуда за оваа несреќа. Предметот бил примен во Апелација на 22 октомври, односно девет месеци по првостепената пресуда. Во Вишото обвинителство стасал на 31 октомври истиот месец, а Обвинителството го вратило во Судот по повеќе од месец и половина. – При спроведување на жалбената постапка, предметот на 23.1.2025 година е вратен на првостепениот суд за отстранување определени неправилности, со цел непречено спроведување на постапката пред овој суд. Со оглед на временската рамка во која предметот бил задржан во првостепениот суд, судијата известител на 21.2.2025 година со писмо-ургенција се обратил до првостепениот суд за што поскоро постапување и повторна достава на предметот. Предметот е вратен на 28.2.2025 година, по што е извршено насочувањето по предметот на 4.3.2025 година и закажана е јавна седница за ден 2.4. и 3.4.2025 година, со почеток во 9 часот – велат од Апелација за „Слободен печат“. И покрај несреќата, автобусите на „Дурмо турс“ продолжија да возат, а по трагедијата во Кочани, компанијата беше казнета од Државниот инспекторат за транспорт, кој констатираше неправилности во нивни автобуси. За Модуларната немаше обвинение за Филипче и Анѓушев. Додека цел свет го тресеше короната, се случија две трагедии едноподруго. На 8 септември 2021 за неколку минути изгоре Модуларната болница во Тетово, а внатре изгореа 14 пациенти што се лекуваа од ковид-19. Дел од нив беа на кислородна поддршка, врзани за кревет и не можеа да избегаат од огнот.
Обвинителството утврди дека спој на кабел поради вклучен дефибрилатор било причината за пожарот. Прегревањето на кабелот предизвикало палење во приклучната кутија на продолжителниот кабел, на кој биле прикачени повеќе уреди. Иако на виделина излегоа и грешки во дизајнот на проектот и голем број прекршувања на законите, тогашниот министер за здравство Венко Филипче и претставник на компанијата „Брако“, која беше изведувач на модуларната болница во Тетово, не беа меѓу осомничените. Во обвинението се најдоа само медицинскиот и економскиот директор на тетовската клиника и дежурниот доктор. Докторот беше ослободен, а во јуни 2023 година, тетовскиот суд ги осуди условно обвинетите директори Флорин Бесими и Артан Етеми за „тешки дела против општата сигурност“. Клиничката болница Тетово беше виновна за „предизвикување општа опасност“. Апелација го врати предметот на повторно судење. Судијата Јордан Велковски, кој го водеше предметот, се повлече поради здравствени причини, а на негово место седна судијата Реџеп Муса. Роднините на загинатите бараат одговорност и од поранешниот министер за здравство, Венко Филипче и поранешниот вицепремиер Кочо Анѓушев, сопственик на „Брако“. Неколку месеци по несреќата во Тетово, на 22 ноември 2021, во Бугарија се запали автобус полн со македонски патници. За 45 живи изгорени патници, меѓу кои 12 деца, единствено вина се утврди кај двајца цариници и кај возачот на автобусот, кој, исто така, загина. Повеќе од 50 патници се враќаа од Истанбул кон Македонија.
Се водеше постапка против управителот на „Беса транс“, Беким Хаџиу, со оглед на тоа што автобусот што изгоре ја поминувал државната граница дури 135 пати со подметната лиценца. Газдата на „Беса транс“ треба да се појави пред судот на 4 април. Тој пред Кривичниот суд беше обвинет на една година и осум месеци затвор, затоа што од јануари до ноември 2021 година, во 20 наврати, искористувајќи ист траен однос, исти околности и слични околности, преку возачите што управувале автобус во сопственост на фирмата, извршил повеќе временски поврзани дејства и употребувал како вистинска, лажна јавна исправа – извод од лиценца за вршење јавен превоз во меѓународниот патен сообраќај. Обвинителот Владимир Милошевски, кој го застапуваше обвинението пред Судот рече оти е задоволен од исходот на судскиот процес бидејќи Судот во целост го прифатил обвинението и теоријата за случајот на Основното јавно обвинителство Скопје и рече дека процесот кој се водел не бил за причините за несреќата. Апелација во декември 2024 го врати случајот на повторно судење, а Хаџиу треба да се појави пред судот на 4 април. – Пресудата на Основниот кривичен суд Скопје е укината со пресуда на Апелацискиот суд Скопје, во која се наведени причините за прифаќање на жалбите на одбраната, а која пресуда е достапна на веб-порталот. По враќањето на пресудата, оформен е предмет со за кој е насочена расправа на 4.4.2025 година – велат од Кривичен за „Слободен печат“.
Поранешната јавна обвинителка Вилма Русковска истражуваше и поврзаност на поранешниот министер за внатрешни работи Оливер Спасовски со станицата за технички преглед „Виа комерц“, каде што спорниот автобус бил проверуван, но случајот беше затворен без кривична одговорност. По трагедијата во Кочани, премиерот Христијан Мицкоски најави отворање на сите претходни случаи и дека ќе се оди докрај за да се утврди што точно се случувало. – Очекувам Обвинителството многу јасно да ја прошири истрагата и да го идентификува не само возачот на автобусот или управителот на правното лице, туку да видиме во кој испитен центар кажале дека тој технички е исправен, кој ја дал да тој испитен центар функционира така што функционира. Зошто во модуларната болница е променето министерството од едно во друго, кога е правена јавната набавка, зошто кабелот е виновен, кој го направил проектот и дали можеби недостигаат некои елементи, таму каде што мислам дека недостигаат. За сето ова ќе има одговор, ќе има разврска – најави Мицкоски.
