Младата уметничка Драгослава Ѓуриќ ќе го црта балканскиот рис и половина од заработката ќе донира на Македонското еколошко друштво кое работи на негова заштита. Драгослава, која е родена во Србија, но повеќе од 20 години живее и работи во Јапонија, неодамна заедно со тимот на Balkan Lynx од МЕД ги посети живеалиштата на рисот во земјава, ги прошета шумите каде што тој се движи и живее и се запозна со неговата историја. Врската на уметноста со природата и животните не е новина ниту за Драгослава, ниту пак за многумина сликари, a заштитата на многу од најзагрозените видови во светот се финансираат преку донации и аукции на уметнички дела. Драгослава како голем љубител и на природата и на животните, трогната од пожарите во Амазон во 2019 година, почнала да донира за напорите за зачувување на природата и сфатила дека нејзината уметност може да стане средство за вистинска промена, со тоа што на купувачите ќе им понуди не само да поседуваат уникатно уметничко дело, туку и можност да ја поддржат заштитата на дивиот свет. Нејзиниот сон е да соработува со организации за зачувување на природата, кои работат на обновување на природните живеалишта и им нудат на животните шанса за опстанок.
„Имав желба да помогнам на некое животно кое навистина е во опасност од изумирање, но тоа да не биде од оние видови кон кои се свртени очите на светот и кои добиваат многу донации. После долго истражување дознав за работата на МЕД и за нивните напори за спасување на популацијата на балканскиот рис и веднаш знаев дека тоа е моето животно“, вели Драгослава. Во март годинава таа напишала мејл до Македнското еколошко друштво во кое ја објаснила својата желба да помогне, а и да го посети живеалиштето на рисот. Од таму и стигнал одговор дека следната теренска посета пролетва ќе биде на крајот на април и дека е поканета да дојде. Драгослава вели дека не очекувала дека за помалку од еден месец ќе успее да донесе одлука и да организира патување преку половина свет во непозната земја, но желбата и предизвикот биле преголеми за да ја пропушти шансата.
„Пресреќна сум што го запознав тимот на МЕД и што ја доживеав од прва рака нивната посветеност на мисијата за спасување на рисот. Тоа уште повеќе ми потврди дека сум донела правилна одлука. Ги посетивме сите локации каде што се поставени камери што го следат балканскиот рис, ги пешачевме сите патеки каде што се движи, на моменти едвај ги следев, но тоа беше едно од најдобрите искуства во мојот живот“, раскажува Драгослава.
Целта, вели, е во следните неколку месеци да наслика неколку големи слики од рисот во техниката масло на платно и да ги понуди на пазарот на уметности заедно со приказната за рисот. Сака да создаде уметничка серија инспирирана од живеалиштето на балканскиот рис, шума обвиткана во магла и тајни, а рисот ќе се појави како последен дел од патувањето низ оваа шума, кое ќе биде раскажано преку слики на печурки, птици, мали цицачи и други суштества што го сочинуваат неговиот жив пулс. Таа планира да ја изложи целата серија кога ќе биде завршена, а поединечни слики ќе бидат достапни за продажба за да се собере поддршка за зачувување на рисовите. Нејзината желба е да успее да собере што поголем дел од годишниот буџет кој е потребен за заштитата на рисот и на тој начин да го даде својот придонес на одличната работа која ја работат македонските еколози. Сите нејзини дела кои се досега насликани, а и тие што ќе ги работи за балканскиот рис, ќе можат да се видат и нарачаат онлајн, преку нејзината веб страница и социјалните мрежи Инстаграм и ЛинкедИн.
„Иако за жал во тие неколку дена додека престојував на планините каде што живее рисот немав можност да го видам во живо, за мене како уметник беше многу важно што ја доживеав неговата животна средина. Моите дека се реалистични и со многу детали, заради што ќе ми биде полесно да го насликам во неговата автентична средина“, вели Драгослава. Таа е тивка и едноствна девојка, но очигледно со големи идеи и значајни мисии во животот. Вели дека е толку одушевена од природата и од работата на Македнското еколошко друштво, што, иако живее илјадници километри далеку, посакува повторно да дојде во посета на земјава. Овојпат да се дружи со тимот на МЕД што ги истражува птиците. Извор: Новинска агенција МЕТА
