Унгарија го откажа состанокот со Украина, на кој треба да учествуваат експерти за права на малцинствата, закажан за денес, наведувајќи го спорот поради кој двете соседни земји протераа дипломати и се обвинуваа меѓусебно за шпионажа. Во изјава доцна вчера, секретарот на унгарското Министерство за надворешни работи, Левенде Маѓар, изјави дека Унгарија го откажала планираниот состанок во Украина бидејќи неодамнешните случувања во билатералните односи не дозволуваат „конструктивни разговори за толку важно и чувствително прашање како што се правата на малцинствата“. Маѓар додаде дека Унгарија останува отворена за дијалог. Во петокот, украинската СБУ соопшти дека привела двајца осомничени агенти, за кои рече дека биле управувани од унгарската воена разузнавачка служба.
„Ова е прв пат во украинската историја да биде откриена унгарска шпионска мрежа која работи против интересите на Киев“, соопшти СБУ. Десничарската влада на Орбан долго време го обвинува Киев за кршење на јазичните права на околу 150.000 граѓани од унгарско потекло кои живеат главно во Закарпатскиот регион во западна Украина, но овој спор сега означува ново дно во односите меѓу нив. Украинската безбедносна служба СБУ соопшти дека двајцата осомничени агенти биле поранешни воени лица и дека се уапсени под сомнение за вршење државна шпионажа. Тој изјави дека тие биле регрутирани од врска во унгарската воена разузнавачка служба. Како одговор, унгарскиот министер за надворешни работи, Петер Сијарто, во петокот изјави дека Унгарија протерала две лица кои работеле како шпиони во украинската амбасада во Будимпешта. Тој изјави дека потегот на Киев е резултат на противењето на Унгарија на обезбедувањето воена помош на Украина.
