По Ниш, студентите во блокада најавија нов голем протест за 15 март во Белград под името „15. за 15″. На пет дена пред протестот за викендот се очекува доаѓање на голем број луѓе од цела Србија и регионот. Доаѓањето на голем број граѓани во Ниш на 1 март го означи вртоглавото поскапување на ноќевањата во тој град на платформите „Букинг“ и „Aрбиенби“. Ноќевање за тој викенд чинеше и до 1.000 евра. Жителите на Ниш на ова одговорија со самоорганизирање преку фејсбук-група каде што понудија бесплатно сместување и превоз за сите што ќе дојдат на протестот, потсетува Данас. Судејќи според огласите на овие платформи, белграѓани засега не ги покачиле цените за сместување, но на пет дена пред протестот на веб-страницата „Букинг“ се достапни само една петтина од становите за изнајмување, односно речиси 80 отсто од сместувачките капацитети во моментов се недостапни.
Најскапи станови за две лица, како и обично, се во општините Савски венац, Стари Град и во населбата Белград на вода, каде цените се движат од 10.000 до 25.000 динари. На неколку километри од центарот, во населените места како Нови Белград, Вождовац, Звездара, може да се резервира ноќевање за четири до пет илјади динари. Еден од нив е стан во Мириево кој може да се изнајми за 4.300 динари. Во Сурчин може да се најде нешто поевтино, по цена од 3.600 динари. Во самиот центар на Земун кај кејот на Дунав, ноќевање ќе чини близу шест илјади динари. Во Нов Белград, во близина на белградска арена, се издава стан за околу пет илјади динари. Слична е ситуацијата и на веб-страницата „Стан на дан Београд“. Помали студија во центарот на градот може да се резервираат по цена од 30 евра. Исто како и за време на протестите во Ниш, белграѓани преку фејсбук-групите бесплатно ги нудат своите домови на неколку лица, со акцент дека приоритет имаат студентите. „Имам гарсониера во која можат да се сместат две лица во Белград. Нудам и превоз назад до градот од кој доаѓате“, стои во една таква реклама.
